Shkarkimi nga LDK/ Vjosa Osmani: Shihemi së shpejti në zgjedhje

Shkarkimi nga LDK/ Vjosa Osmani: Shihemi së shpejti në zgjedhje

22:15, 20/06/2020

Kryetarja e Kuvendit të Kosovës, Vjosa Osmani reagon pas shkarkimit nga poste që mbante në LDK.

Përmes një postimi në Facebook, më e votuara nga partia e saj në zgjedhjet e 6 tetorit 2019 jep versionin e saj lidhur me këtë shkarkim.

"I falenderoj 53 anëtarët e Këshillit të Përgjithshëm që nuk u bënë pjesë e këtij diferencimi politik. Ndërsa për diferencuesit e sotëm, shihemi në garën zgjedhore së shpejti. E aty do ta shohim se kush do të fitojë kur të dalim para qytetarëve", shkruan ndër të tjera Osmani. 

Reagimi i plotë i Vjosa Osmanit:

Po përjashtohem e diferencohem sepse:
Thashë kurrë me të korruptuarit, dhe ashtu mbeti;
Thashë do t’i sjellim Kosovës ndryshimin e jo mendësinë e vjetër në pushtet, dhe ashtu mbeti;
Thashë se nuk do ta përkrahë asnjë tregtar të kufijve e të sovranitetit, dhe ashtu mbeti.
Thashë për Kosovën do të kërkojmë barazi nëpërmjet reciprocitetit, dhe ashtu mbeti;
Thashë se askujt nuk do t’i punojmë pas shpine, dhe ashtu mbeti;
Pra, u diferencova e shkarkova sepse e mbajta fjalen.
U diferencova edhe për shkak se jam grua, sepse asnjë nënkryetar burrë në të kaluarën, edhe kur kanë kundershtuar e vepruar kundër vendimeve të partisë, nuk janë përjashtuar.

Por, të dashur qytetarë të Kosovës, sistemet që themelin mbi të cilin qëndrojnë e kanë diferencimin, janë gjithnjë të destinuara të dështojnë. Kështu ka qenë në të kaluarën, e kështu do të jetë edhe tash e tutje, të jeni të bindur. Prandaj po e përsëris atë që e kam thënë në Kuvend më 25 mars:

Në politikë, sikur edhe në jetë, ndonjëherë duhet ta paguash çmimin e të qenit parimor. Unë e kam provuar në lëkurën time më shumë se njëherë. Por, parimësia tregon udhën e vërtetë, edhe kur ajo është e mbushur përplot gjemba. E, unë nuk përtoj t’u rrekem këtyre pengesave për ta bërë të dukshme dritën, edhe nëse kjo nuk kuptohet nga disa mendjeshkurtër që sot votuan për përjashtimin e diferencimin tim. Por është një udhë që unë e kam ndjekur këto 20 vjet e ajo është udha që ta shtron besimi qytetarë dhe asaj nuk e kam ndërmend t’i ndahem kurrë. Në secilën betejë, do të jem me qytetarët, deri në fund.

I falenderoj 53 anëtarët e Këshillit të Përgjithshëm që nuk u bënë pjesë e këtij diferencimi politik. Ndërsa për diferencuesit e sotëm, shihemi në garën zgjedhore së shpejti. E aty do ta shohim se kush do të fitojë kur të dalim para qytetarëve. Gara e vërtetë është para qytetarëve, edhe pse shumica dërmuese prej jush diferencues, jeni aq frikacakë sa nuk do të guxoni të dilni në atë përballje, por sërish do të fshiheni prapa dikujt tjetër. Por përballja e madhe do të ndodhë. Mua më ka ngritur populli dhe vetëm ai do të mund të më rrëzojë.

Bring it on! 

© SYRI.net

Lexo edhe:

Tags

Komentet

Shqiptari20/06/2020 23:08

E vetmja rruge e drejte eshte qe ju se bashku me ata 53 mbeshtetesit tuaj ne Keshillin e Pergjithshem te largoheni perfundimisht nga LDK dhe te krijoni partine tuaj te re. Ky eshte momenti me pozitiv dhe me shume avantazhe per ju personalisht dhe ata 53 anetaret e KP. LDK perfundimisht e ka humburr rrugen, parimet dhe qellimet e veta demokratike. LDK sot e pergjithmone eshte kthyer nje parti private e Isa Mustafes dhe vegel shantazhi ne duart e tij. Krijoheni sa me pare partine tuaj te re te vertete demokratike. Kjo eshte ne interes te kosoves dhe te votuesve tuaj.

Shto koment

Denonco