Debati për Festivalin, Diana Ziu ka 5 pyetje për Ramën: Ku e gjejnë guximin Vera dhe Zhani për të shpërdoruar 400 milionë?!

Debati për Festivalin, Diana Ziu ka 5 pyetje për Ramën: Ku e gjejnë guximin Vera dhe Zhani për të shpërdoruar 400 milionë?!

10:54, 09/11/2019

LETER E HAPUR PER Z. EDI RAMA

NGA DIANA ZIU

Z. Kryeministër, ndoshta gabohem kur mendoj se zërat publike kanë ende impakt në shoqërinë tonë, por po e bëj dhe një përpjekje.

Është mëkat që ka njerëz, të cilët më tepër do humbasin kohë për mbrojtjen e modelit të vjetër të shikimit të botës, se sa ta rregullojnë atë.

Po e nis një letër të thjeshtë, por të rëndësishme për shoqërinë sot, për t’ju vënë në dijeni për çrregullime, abuzime, heqjen e vlerave të artistëve, mungesë transparence e favorizim në një vend ku dënohesh për 40 mijë lekë drita dhe quhesh zotni, kur me 400 milionë bën si të të dojë qejfi.

Por unë do vazhdoj t’i quaj me emërtimin e tyre të vjetër apo të rinisë së tyre më saktë, shoqja Vera dhe shoku Zhani, sepse nuk habitem kur shoh se ende janë të brumosur me kohën e urdhrave nga lart, ndaj dhe më lind pyetja:

Ose e kanë urdhrin nga lart, ndaj bëjnë çfarë të duan - ose bëjnë çfarë të duan, për sa kohë nuk kanë urdhër nga lart !

Kush vallë i përkrah kaq shumë?

Ku e gjejnë atë forcë mbështetëse që duhet për të bërë si në mall të babës me pronën e shtetit, me 400 milionë lekë fonde e më e rënda, me vetë krijimtarinë kombëtare?!

Z. Kryeministër, doni apo nuk doni ju, ju jeni "urdhri nga lart" për këtë kategori kuadrosh të Realizmit Socialist, të cilët mendojnë ende se boll të jesh në rregull me Partinë, pa në djall të tjerat.

Ajo që më shqetëson më shumë sot si intelektuale dhe krijuese, nuk janë dy shokët për të cilët gjithë vendi ka një javë që gumëzhin për abuzimin me pushtetin dhe fondet, por për modelin që ata kanë krijuar dhe mirëmbajnë pa iu hyrë gjemb në këmbë. Pa folur për marrjen e frymës që i bëjnë dhjetra e dhjetra regjizorëve dhe artistëve të rinj, të cilët nën ombrellën e shokëve në fjalë, nuk kanë asnjë mundësi përveç se të ikin, e të ikin nga sytë këmbët madje.

5 pyetje publike për ju dhe Kryetarin e Kuvendit nga i cili varet TVSH-ja:

1. Pse nuk ka një ekip kontrolli për procedurat e konkurimit, të shkelura me fakte publike?

2. Si mund të mos ketë as rregullore të miratuar, as një këshill artistik për një aktivitet, që menaxhon mbi 400 milionë lekë, fonde publike?

3. Si janë shpallur këngë fituese, materiale të cilat nuk janë shkruar apo përfunduar ende dhe sot?

4. Si është e mundur që mekanizmat për transparencën dhe luftën kundër korrupsionit, vetëm në Festivalin e RTSH nuk ndërhyjnë dot?

5. A e keni forcën të urdhëroni nga lart që të mos përdhoset krijimtaria kombëtare apo i vetmi urdhër nga lart për këta njerëz është vetëm ai i Krijuesit?!

Me respekt
Diana Ziu

Image

© SYRI.net

Lexo edhe:

Komentet

Sehiri09/11/2019 12:26

Nuk i marr vesh edhe aq keto te artit,por t’i drejtohesh “me respekt” Edvin Mafise e të mos kesh respekt per zoti Zhani Ciko, eshte perversitet!

Shto koment

Denonco