Edhe pse ishte një formalitet, sepse ka zgjatur vetëm pak minuta, KQZ hapi 11 kuti të votimeve të 30 qershorit në bashkinë e Lezhës dhe zbuloi se janë vjedhur vota, në dëm të kandidatit Eduard Ndocaj dhe në favor të Pjerin Ndreut të PS-së. Sipas burimeve zyrtarenë KQZ, ka rezultuar se të njohurit si “Kaubojsi”, i janë vjedhur 4 vota.

Gjatë mbledhjes u bë numërimi i votave në secilën nga 11 kutitë e kontestuara nga ish-deputeti Ndocaj, për të parë nëse ka parregullsi nga shifra e votave totale që janë shënuar në procesverbal nga KAZAZ-të.

Sipas pretendimeve të Eduard Ndocajt, kandidatit për kryebashkiak përball Ndreut, në 11 qendra votimi në bashkinë e Lezhës ka pasur më shumë vota sesa votues dhe për këtë arsye, u vendos që të hapen kutitë për të parë nëse ka apo jo shkelje.

Pavarësisht se votimet u kryen në qendra të kontrolluara nga komisionierë të PS-së; u numëruan dhe u vulosën po prej tyre; u rihapën sot prej KQZ-së e cila është gjithashtu mono-partiake, sërish rezultoi se “Kaubojsi” është vjedhur në favor të Pjerin Ndreut të Rilindjes. Pavarësisht se numri 4 i votave të grabitura nuk ndryshon rezultatin “fake”, sërish kjo tregon se çfarë ka ndodhur në realitet me votimet mono-partiake të 30 qershorit si dhe përgjegjësinë ligjore të komisionierëve të PS.