Nënkryetari i AMA-s, Sami Neza ka reaguar pas shkarkimit nga detyra të anëtarit të këtij institucioni Zylyftar Bregut duke e konsideruar si një përpjekje për të ndryshuar raportet në bordin e këtij institucioni, i vetmi institucion në Shqipëri që sipas tij nuk drejtohej ekskluzivisht nga mazhoranca.

“Anëtarët e AMA-s në shumicë kanë kundërshtuar dhe refuzuar si të paligjshme nisjen e kësaj procedure që në fund të vitit 2018, duke e konsideruar atë si një presion të hapur të mazhorancës parlamentare ndaj një institucioni të pavarur, refuzim për të cilin ishte në dijeni edhe Parlamenti edhe opinioni publik”, shkruan Neza.

Ai vijon më tej duke thënë se nga ana tjetër vendimi i Kuvendit për miratimin e ligjeve antishpifje ndaj mediave online, është një project që sipas tij ngarkon AMA të nxijë faqen me censurimin e mediave të shkruara në internet, “gjë që nuk e ka bërë dhe as mund të bëjë për mediat audioviizve, rregullator i të cilave është. Në mazhorancë bordi i AMA ishte kundër këtij projekti cfarë e bënte nul edhe implementimin e ndryshimeve ligjore që synojnë kontrollin e mediave online”.

Neza e konsideron shkarkimin e anëtarit të AMA-s si një sinljal që tregon se sa në rrezik janë institucionet e pavarura në vend dhe liria e medias.

Ja reagimi i plotë:

Parlamenti liroi nga detyra anëtarin e AMA-s Zylyftar Bregu në përpjekje për të ndryshuar raportet në bordin e këtij institucioni, i vetmi institucion në Shqipëri që nuk drejtohej ekskluzivisht nga mazhoranca. Procedura e ndjekur për shkarkimin e Bregut është e paligjshme. Ajo mbështetet në akuzën për konflikt interesi për shkak të një kontrate qeraje , realizuar shumë vite me parë, pa asnjë lidhje me aktivitetin audioviziv. Deklarata e pasurisë dhe interesave të Bregut është kontrolluar dhe vlerësuar më herët përmes një kontrolli të thellë nga ILDKPI, ku subjekt i kontrollit ka qenë edhe kontrata e qerasë, përpara se Parlamenti ta rizgjedhte z. Bregu në vitin 2016 në detyrën e anëtarit të AMA.

Anëtarët e AMA-s në shumicë kanë kundërshtuar dhe refuzuar si të paligjshme nisjen e kësaj procedure që në fund të vitit 2018, duke e konsideruar atë si një presion të hapur të mazhorancës parlamentare ndaj një institucioni të pavarur, refuzim për të cilin ishte në dijeni edhe Parlamenti edhe opinioni publik. Vetë Parlamenti e ndërpreu procedurën e shkarkimit duke anuluar një votim në fillim të vitit 2019.

Procedura e ndërprerë në atë periudhë rifilloi nga Kuvendi në mënyrë të papritur në fund të muajit qershor, kjo e lidhur tërësisht me draftimin e ligjit per mediat online nga ana e qeverisë, projekt që ngarkon AMA të nxijë faqen me censurimin e mediave të shkruara në internet, gjë që nuk e ka bërë dhe as mund të bëjë për mediat audioviizve, rregullator i të cilave është. Në mazhorancë bordi i AMA ishte kundër këtij projekti cfarë e bënte nul edhe implementimin e ndryshimeve ligjore që synojnë kontrollin e mediave online.

Shkarkimi i Bregut është një sinjal se sa të pasigurta janë institucionet e pavarura në vend për të ushtruar zbatimin e ligjit, se sa e kërcënuar është liria e medias dhe sa e vështirë është të jesh përballë qeverisë e cila nuk kursen edhe votat e mazhorancës në parlament për të marrë kontrollin e medias.