Kryeministri i Kosovës, Ramush Haradinaj, sërish ka treguar integritet të lartë në detyrën që mban. Vetëm sepse një prej anëtarëve të kabinetit të tij është fotografuar në makinën duke mbajtur këmbët përpjetë mbi kofnie, ai e ka shkarkuar pa hezitim nga detyra.

“Sot kam liruar nga detyra zëvendësministrin e Ministrisë së Bujqësisë, Pylltarisë dhe Zhvillimit Rural, Shukri Maxhuni”, ka shkruar Haradinaj në Facebook.

Dy ditë më parë, Maxhuni, gjatë një udhëtimi me makinë zyrtare është fotografuar teksa mbante këmbët lart në xhamin e përparmë të makinës. Ky veprim i tij ngjalli reagime dhe kritika të shumta në opinion. Kurse zëvendëskryeministri i Kosovës, Behgjet Pacolli, i ka kërkuar kryeministrit Ramush Haradinaj edhe zyrtarisht që të shkarkojë atë nga posti për sjellje të pahijshme.

Nga ana tjetër këtu në Shqipëri kemi shembullin e kundërt të një kryeministri tjetër shqiptarë, Edi Rama. Ky i fundit edhe pse zyrtarë të lartë të administratës, policisë, partisë e deri në rang ministrash janë kapur në përgjime, jo vetëm duke organizuar vjedhje votash, por edhe duke përdorur një fjalor banal të denjë për llumin e rrugaçëve, nuk ka marrë asnjë masë, përkundrazi i ka mbrojtur dhe i ka ngritur në detyra.