Zgjedhjet lokale të 30 qershorit, edhe pse ende nuk dihet fati i tyre, po priten me shumë dëshirë nga partia Bindja Demokratike. Por para se të shkohet në to, forca politike e Astrit Patozit, që reklamon në publik garimin në të gjitha njësitë administrative të vendit, më parë duhet të sigurohet me kandidatët në listat e saj.

Së fundmi, 21 kandidatë të Bindjes Demokratike janë tërhequr nga kandidatura e tyre në listën shumëemërore të kandidatëve për Anëtarë të Këshillit Bashkiak Fier, në zgjedhjet e 30 qershorit të 2019-ës.

Sipas asaj që raporton Balkanweb, në kërkesën e shkruar nga përfaqësuesi Astrit Haziz Hoxha,  argumentohet se, kjo dorëheqje e shumëfishtë, vjen  nga gjithë emrat e renditur në këtë listë, të cilët kërkojnë të mos jenë pjesë e zgjedhjeve.

“Unë Astrit Haziz Hoxha  kam hartuar listën plotësuese për anëtarë të Këshillit Bashkiak Fier për partinë Bindja Demokratike deri në numrin rendor 21. Kjo listë është hartuar prej meje pa dijeninë e personave që marrin pjesë në të. Duke qenë se kjo listë nuk është si shprehje e vullnetit të lirë të personave që ndodhen në të , i kërkojnë KQZ-së të tërheqë këtë listë si më poshtë nga kandidimi”, shkruhet në kërkesën drejtuar KQZ-së.