Studentë të 7 fakultete të Universitetit të Tiranës votuan sot për të zgjedhur përfaqësuesin e tyre në bordin drejtues të këtij universiteti.

Studentët kanë votuar për tre kandidatë në garë, aktorin Florian Binaj, psikologen Denada Toçe, si edhe pedagogun Llesh Lleshaj.

Report Tv ishte i pranishëm sot në disa prej fakulteteve të UT, ku disa studentë u shprehën skeptikë në lidhje me vërtetësinë e votimit, pasi siç dihet në fund kandidatura përzgjidhet nga ministrja Besa Shahini.

Por kishte edhe prej atyre studentëve të cilët kishin besim në zgjedhjen e ministres.

“Për sa kohë na u dha mundësia të votojmë në mënyrë të lirë, ministria e arsimit do shohë vendimmarrjen tonë. Duke marrë parasysh zgjedhjen që kemi bërë", shprehen disa studentë për Report TV.

Në lidhje me këto zgjedhje ka folur edhe kryetari i komisionit të zgjedhjeve në fakultetin Ekonomik Alban Korbi, i cili tha se kandidatët kishin gjetur një dakortësi që ti hapnin rrugën fituesit, pasi ata që do të merrnin më pak vota do të tërhiqeshin vullnetarisht nga gara.

“Janë tre kandidatë gjithsej. Siç dihet ministria ka të drejtë të vendosë, nga tre kandidatët. Por në këtë rast ky problem nuk ekziston, pasi në takimet që janë zhvilluar publikisht, kandidatët kanë deklaruar që dy të tjerët, do të tërhiqen duke ia lënë vendin kandidatit më të votuar", deklaron Korbi.

Deri tani janë zgjedhur dy anëtarë të Bordit që do të përfaqësojnë Ministrinë e Arsimit. Bëhet fjalë për Enida Bazhanin dhe Laureta Omerin.

Anëtari i tretë që do të përfaqësojë studentët do të jetë personi që do të shpallet fitues nga zgjedhjet e zhvilluara sot, të cilat nisën në orën 08:00 dhe përfunduar në orën 16:00.