I akuzuar për trafik ndërkombëtar droge të kryer në bashkëpunim, në formë të posaçme të grupit të strukturuar kriminal, si edhe korrupsionin pasiv të funksionarëve të lartë shtetëror, ish-ministri Saimir Tahiri është kërkuar që të paraqitet në Prokurori për tu njohur me përfundimin e hetimeve ndaj tij.

I pyetur mbi pritshmëritë rreth këtij vendimi, ish-deputeti demokrat Enkelejd Alibeaj, në cilësinë edhe të juristit, thotë se të paktën 2 nga 3 akuzat që rëndojnë ndaj tij janë të provuara.

Alibeaj: Për ato çfarë unë kam parë që në 20 shtator të 2017 kur kërkesa e prokurorisë erdhi në Këshillin e Mandateve dhe Rregullores, për ato çfarë media nxori më vonë, është totalisht një situatë e provuar. Për paktën dy nga tre akuzat që ka. Por a kemi ne një sistem prokurorie dhe një gjyqësor të lirë? Nuk e kemi. Me Arta Markun, Donika Prelën, apo me gjyqtarë mbi kokën e të cilëve qëndron vettingu i Edi Ramës. 

Kjo është çështje që lë shumë për të dëshiruar. Kushdo sot e di se çfarë ka ndodhur në këtë episod, Shqipëria u kanabizua nga jugu në veri, bandat lulëzuan dhe krijuan potencialin më të madh kriminal dhe sot kemi arritur nga vendi me kanabizimin më të madh në vendin tranzit për drogat e forta dhe pastrimin e parave. I kemi faturë nga ky Kryeministër dhe nga ai Ministër.

Në përgjigje të kritikave të ndërkombëtarëve mbi djegien e mandateve parlamentare nga opozita, ish-deputeti Enkelejd Alibeaj thotë se nuk mund të prevalojë më stabiliteti mbi demokracinë.

Alibeaj: I dashur ndërkombëtar ti ke dhe hallet e Europës tënde ku ne do të duhet të shkojmë duke qenë të sinqertë. Nuk mund të mbahet ai që quhet stabilitet si një sarkofag brenda të cilit të jetë kufoma e pakallur e një sistemi demokratik që kurrë nuk është krijuar. Nuk mund të ketë stabilitet ku qeverisin bandat, ku nuk ke Gjykatë Kushtetuese, Gjykatë të Lartë. KLGJ dhe KLP janë krijuar që në 22 dhjetor, 5 anëtarë i ka zgjedhur Ulsi Manja dhe 6 Arta Marku.

I ftuar në Ora News, Alibeaj thotë se opozita duhet të angazhohet fort për të qartësuar edhe ndërkombëtarët mbi situatën reale të vendit.

Alibeaj: Është detyrim i yni që me durim ti sqarojmë të gjithë ndërkombëtarët dhe partnerët, ata që ja duan të mirën Shqipërisë dhe shqiptarëve, për arsyet e vërteta pse kemi marrë këtë iniciativë dhe pse duhet një orë e më parë për ti dhënë zgjidhje kësaj krize. Europa bëhet në Shqipëri jo duke çuar atje shqiptarët e varfër. Kjo qeveri ka rënë.