Ministri i Brendshëm Fatmir Xhafaj nuk i është përgjigjur  gazetarëve  dhe është larguar duke iu kthyer shpinën sot, pasi e kanë pyetur për dëshmitarin e rremë Fredi Alizoti në çështjen e audiopërgjimit të vëllait të tij.

Ministri Xhafaj ishte me kreun e Zyrës Federale Kriminale Gjermane, Zv.Presidentin Peter Henzler për një deklaratë, por nuk iu përgjigj së vetmes pyetje që është në fokusin e politikës këto ditë dhe ka ngjallur debate të shumta.

“Nuk do të preferoja të bëja një koment, se boll kam bërë komente për këtë çështje, - tha Xhafaj. - Edhe për një arsye fare të thjeshtë. Se kjo është një çështje që i takon drejtësisë dhe unë besoj se kam kulturën e nevojshme politike, institucionale dhe ligjore që tërespektoj në çdo moment, autoritetet e drejtësisë dhe vendimarrjet e tyre. Sa i përket çështjes që është duke u përfolur kaq gjatë dhe bërë temë dite,  është një çështje në hetim të plotë nga prokuroria e Krimeve të Rënda dhe pastaj gjykatës. U takon atyre të japin verdiktin. Sa më përket mua, unë jam ministër i Brendshëm, jam në këtë detyrë vetëm për një qëllim, të shërbej qytetarëve të vendit tim. Jam i fokusuar në përgjegjësitë e mia, luftën kundër krimit të organizuar. "