Cili jeni ju zoti Basha? Ngjan si titulli i një filmi i një kohe të vjetër, por që për fat të keq ka ndodhur dje dhe në mes të Tiranës. Si në kohë të errëta, të zymta demokracie, qengji i butë i frymës se tolerancës dhe një politike te re moderniste, që për një dekadë të tërë kërkoi të promovonte një imazh krejt të ndryshëm nga partia e mëparshme e zotit Berisha, më në fund e çori maskën. Marifetet e vulës dhe rrëmbimi i saj me ndihmën e drejtësisë së zotit Rama, për një vit të tërë ai i drejtoi në fshehtësi, jashtë skenës, me duart e Alibejve të puthura nga pushteti. Ata e ndërtuan me pabesi, si skuthë të vegjël të manipuluar nga regjimi i Ramës, pikërisht për të dëmtuar sa me shumë demokratët në zgjedhjet e majit, kalin e trojës së një partie të reduktuar në asht, por që i vjedh partisë së vërtetë se PD së Berishës mundësinë per te pasur numërues, komisioneve dhe logon e saj simbolike.

Kujtuam se ligësia kishte një fund me këtë veprim, por ligësia në emrin e Bashës ka fund qiellin. Si i urdhëruar nga një ëndërr e keqe, por qesharake a nga një zekth përvëlues i ortakërisë me pushtetin, që e kishte ujitur nëndheshëm për vite me radhë, ai shfaqet befas si i mbirë nga hiçi dhe boshllëku në një miting me të rinjtë dhe pionierët e grumbulluar nga regjimi grotesk dhe qesharak. Pëshpërit paturpësinë e radhës për t'u ngritur në revolta, duke harruar se kurrë, për asnjë zgjedhje të humbur prej tij, nuk pati guxuar të bëjë, qëndresë apo denoncim, le pastaj të ngrihet në revolta. Epo lajthitje thamë, e personit te tij arrogant me simptoma autike, i fryrë dhe bosh, jashtë realitetit politik, por edhe qesharakësi e eprorit dhe urdhëruesit të tij, zotit Rama.

Por produktin më të fëlliqur të këtij pseudo politikani sharlatan të trazicionit e bëjnë deklaratat e tij të çartura, që dhunën e orkestruar qartësisht nga ai dhe grupi i tij kundra kolegëve, që llahtarisej t'i mendonte si rival, e që komandohen nga dhoma e butonave të kryeministrit, e quan një debat konstruktiv.

Pritshmëritë e dyshimta - thoshte Shekspiri, të lëndojnë ose të turpërojnë.

Nuk e di, nëse vërtet janë lënduar ose turpëruar deputetët përreth tij, që mbrëmë i fyeu dhe i përdhunoi me marionetat e tij të dhunës, të cilët vazhdojnë të vërtiten rreth “statukuos” edhe ashtu, edhe kështu, pa një mendim politik .

Por për një gjë jam i bindur, se edhe ata përtej pushtetit, që e futën Lulzim Bashën në brazdën e tyre për t'u shërbyer, dyshoj se mbrëmë kanë ndier bezdi të neveritshme për të.