Në tre muajt e parë të vitit, qeveria mblodhi 250 milionë euro taksa më shumë se tremujori i parë i vitit të kaluar. Pjesa dërrmuese e kësaj shtese vjen direkt nga rritja e çmimeve në treg. Pra qytetarët goditen dyfish. Një here nga rritja e çmimeve, një herë nga rritja e taksave që i paguajnë qeverisë. 

Por çfarë ka ndodhur në krahun e shpenzimeve? Për të njëjtën periudhë, transfertat sociale për pagesën e papunësisë dhe ndihmën ekonomike u ulën me 6 milionë euro. Ndërsa shpenzimet për pagat e nëpunësve publikë u rriten në total me më pak se 1 milionë euro.

Tani kalojmë te çmimet. Në prill, çmimet në treg ishin sipas INSTAT 6.2 për qind më të larta se sa prilli i vitit të kaluar. Por ky është vetëm treguesi mesatar. Për shtresat me të ardhura të ulëta, inflacioni është sakaq dyshifror sepse të varfrit kanë strukture tjetër konsumi. 

Ata shpenzojnë më shumë për ushqime dhe mallra bazike. Këto janë pikërisht mallrat me rritjen më të lartë të çmimeve. Mjaftojnë vetëm tre shembuj. Çmimi i bukës është rritur me 16.7 për qind më shumë se prilli i vitit të kaluar. Qumështi, vezët dhe djathi janë shtrenjtuar me 17.1 për qind, ndërsa vaji me 24.2 për qind.  

Të varfrit marrin më pak mbështetje financiare nga qeveria, paguajnë më shume taksa për qeverinë, por kostoja e jetesës u është shtrenjtuar me rend dyshifror. Me pak fjalë ky është konsolidim fiskal në kurriz të fukarenjve.

Megjithatë pasojat sociale të politikave të ngurta të qeverisë janë vetëm një pjesë e shqetesimit. Një pjesë tjetër lidhet me pasojat ekonomike.

Rritja e çmimeve është rrugë me një kalim. Nëse rriten, çmimet nuk kthehen më mbrapsht. Por çfarë ndodh kur çmimet rriten, ndërsa rrogat jo? Kërkesa reale në treg ulet. Kur nuk ka kërkesë, ndërmarrjet ulin prodhimin. Me pak fjale prodhimi kalon në stanjacion, ndërsa ekonomia në krizë. 

Qeveria ka vetëm një rrugë për të zbutur këtë spirale negative. Rritjen e rrogave në të gjithë spektrin. Një pjesë të parave që merr shtesë, duhet t'i kthejë sërish mbrapsht në formën e rritjes së rrogave dhe pensioneve.

Ka dhe një rruge tjetër, veç kësaj. Të bëjë propagandë ashtu siç po bën dhe të paraqesë paketa me 20 miliardësha imagjinare për mosrritjen e çmimit të energjisë. Kjo e dyta është masë e garantuar, 100 për qind efektive në rezultat. Stanjacion prodhimi dhe krizë ekonomike.