Gjymtimi i universiteteve publike

Gjymtimi i universiteteve publike

Nga Luçiano Boçi - 13/10/2019

Nesër nis procesi akademik në Universitete dhe gjithçka i ngjason një situate pas lufte. Universitetet publike janë tashmë të shpartalluara plotësisht e të gjymtuara. Nuk shërbeu as protesta e studentëve e as akreditimi, për të cilin pothuaj nuk flitet më fare, që ato të fillonin të ringriheshin.

Procesi i regjistrimit të studentëve vazhdon në një ritual që prodhon vetëm absurditet, drama dhe gajasje, ku vende bosh në degë të caktuara ka plot, por maturantë që i dorëzohen rrugës, ka me mijëra. Nuk ka më as meritë dhe as preferencë.

Matura ka kohë që është vrarë, ndërsa cilësia që prodhohet falë pasionit individual të mësuesit e nxënësit në shkollat tona më të mira, zhvlerësohet nga inflacioni i notave të periferisë, ku vlerësuesi më së shumti nuk është shkolla. Është politika që fut hundët.

Inxhinier në Shqipëri bëhesh dhe po ta kesh mesataren 6 e matematikën e fizikën 5, por nuk mund të bëhesh psikolog, ose sociolog nëse nuk e ke 7.5, sipas mençurisë së Ramës. Me 6 del dhe jurist dhe ekonomist dhe infermier, por jo mësues i ciklit fillor.

Askush nga qeveria nuk denjon të shohë realitetin mjeran të ulur këmbëkryq atje në ‘atelienë’ që prodhon elitën e një vendi. Mjerim financues, mjerim shkencor, mjerim akademik.

Braktisja, përçmimi dhe linçimi i akademizmit dhe shkencës vazhdon me pasionin e një të çmenduri dhe krenarinë e injorantit.

Pa cikël të tretë studimesh, pa Këshill Profesorësh, por dhe tani pa numër studentësh, shumica e Universiteteve publike kanë humbur, jo vetëm shkëlqimin e dikurshëm, por kanë humbur dhe emrin.

Tashmë janë thjesht ca Kolegje të rëndomta, të shpërndara në territor, që në shumicën e tyre prodhojnë ‘krahë pune’ të freskët për vendet e zhvilluara, që shpërndajnë dije nënmesatare dhe që në luftën për mbijetesë, janë shndërruar në ndërmarrje ekonomike të lodhura, ku çfarë nuk ndodh.

Universiteti i Shkodrës, i Elbasanit, i Korçës, i Vlorës, i Durrësit më pak, kanë humbur këtë vit akademik, degët më themeltare: historinë, gjuhën, matematikën, fizikën, biologjinë, kiminë, gjuhët e huaja, por dhe më të rejat disi psikologjinë, filozofinë, sociologjinë dhe janë mpakur në degë si ekonomiku me derivatet e tij, gazetari, gjuhë angleze etj.

Kaosi që do lindë nga ky zhbalancim do japë efektet negative në shoqëri dhe ekonomi pas disa vitesh.

Ndërkohë, kanë rritur fiktivisht pa respektuar dinamikën e kërkesës së brendshme, degët që nxisin rininë drejt një braktisje pa kthim.

Madje Universiteti i Gjirokastrës ‘po mbledh plaçkat’ për të shkuar i sigurtë drejt fikjes.

Ndërsa Universiteti i Tiranës, ndonëse nuk cungohet në degë, copëtohet në territor dhe në laboratorin natyror.

I rrëmbehet me një grabitje perfide Kopshti Botanik duke e lënë në qiell të hapur Fakultetin e Shkencave pa zemrën e procesit akademik e të kërkimit shkencor.

Kësisoj gjymtimi fizik i Universiteteve publike është apokaliptik.

E brenda këtij gjymtimi, entuziazmi politik qesharak i qeverisë për suksese reformash nuk resht.

Besa nesër do flasë për paktin, duke lënë pa përmendur faktin dramatik të situatës, shpartallimin e Universitetit publik dhe kërkimit shkencor. Përkundrejt Besës fatlume, studentët fatkeqë do vazhdojnë të paguajnë përsëri më shumë tarifa për ciklin e parë dhe për masterin, do ulen po në të njëjtët auditorë pa ngrohje e kushte optimale, pa laboratorë bashkëkohorë e pa shpresë në të ardhmen e në fund do marrin një karton me të cilin do kënaqin vetëm familjarët, por aspak ambiciet e dëshirat e tyre jetësore.

Pedagogët do vazhdojnë të jenë thjeshtë ca mësues të papërkrahur, të papaguar si kolegët e tyre parauniversitarë dhe të anatemuar me mëkatet e tyre mbi shpinë.

Rama do listojë arritjet e tij për profesionistët që do mbushin vendet e punës imagjinare që ai promovon me propagandë, duke lënë mënjanë eksodin akademik të 12 mijë studentëve më të mirë që këtë vit braktisën vendin. E braktisën për shkak të tarifave marramendëse, për shkak të mungesës së të ardhmes, për shkak të rrënimit ekonomik e social.

Do i bjerë gjoksit që e futi në shina ‘çaf-çufi’ Akademinë me Gjinushin e vet. Do shajë ‘me kuç e me maç’ stafet akademike e studentët ‘dembelë’ e ‘mbetës’ që duan favore sipas tij. Do lavdërohet për ekselentë të cilët janë të tillë fale vetes e familjes e jo falë Ramës dhe që ky realisht i ka lënë të ecin spontanisht pa asnjë orientim dhe pa asnjë mbështetje.

Asnjë fjalë nuk do artikulojë për atentatin që i ka bërë Universiteteve publike që me Ligjin e Arsimit të Lartë e në vazhdim. Asnjë fjalë për mungesën e financimit për Universitetet. Asnjë fjalë për shkurtimin e sivjetshëm me aktin normativ të buxhetit për Arsimin e Lartë. Asnjë argumentim për xhevahiret e tij kryeministrore, që Bachelorin në degët e mbyllura e konsideron mësuesi, kur profesioni nis kristalizohet me masterin. Asnjë fjalë për braktisjen e studentëve në mëshirë të fatit.

E pas kësaj maskarade Universitet e çala publike nga nesër do nisin zvarritjen e tyre inercike drejt askundit, në një vend që shkon drejt askundit, duke u tërhequr zvarrë prej një askushi në krye.

Por nesër vjen dhe një shpresë. Studentët do nisin rrëzimin e absurdit.

© SYRI.net

Lexo edhe

Komentet

krasasi tp13/10/2019 14:25

Më raftë pika, sa merak të ka ngel 'Kopshti Botanik".Meqë 'investuar' shumë, unë kam një ide që më duket interesante për ti qetsuar të gjitha 'palët'(grupe interesi).Ju ,disa Dekan,Z.Velija me të tijtë,pas VKM 501,shkëmbeni 'Kopshtin Botanik' me një sipërfaqe tjetër nga kurora i Tiranës dhe te 'Kopshti Botanik' ngrini disa shumëkatëshe por që gjithçka të jetë okej,përfshini edhe ndonji arkitekt,financues apo ambasador ,mundësisht nga sëra e atyre që janë kundër Integrimit të Shqipërisë në BE me kushte.Kapni ç'të kapni, por edhe pak kujdes duhet.Z.Rama lëshoj edhe një kushtrim për KCK..'Ik se të kapa'.Eshtë Kushtetuta Z.Bylykbasha të cilën, politika e ka kthyer në letër higjenike.Kufijtë e veprimit të VKM edhe ato para VKM të 2001, edhe ato para apo pas 501 e kan një cak.Kufiri mbaron te "thana".'Fillozofitë' e atij Qilit të UET,mbi rrezikun e etatizmit në Kosovë,nuk përligj dot demagogjinë dhe konfliktin e interesit.Kur do godina dhe truaje për inisiativa private në fush?7n e arsimit( të mirëpritura) i pëlqen etatizmi.Kur do që Doktoraturat ti jap vetëm Qili,me 8000 Dollar me ndihmën e M.A Z.Tafaj, i pëlqen etatizmi.Kur do që masterat ti jap me 'shumicë' për të përligjur futjen në administratën publike 'doktorët e shkencave' prodhim i universiteteve private kioska,i shërben 'etatizmit'.Kur ngushtohet për pare, e harron antietatizmin.I kërkon Bordeve të Universiteteve t'ja mbushin xhepet.E kupton Z.Bylykbashi se si mungesa e konkurencës,starti i pa barabartë,korrupsioni dhe shpesh b...lëpirja çon në kapje të shtetit.E kupton se pse përpjekja për ta ç'kapur shtetin, është shprehje e patriotizmit të elitave dhe qytetarëve në të dy anët e kufirit.Nuk e kam 'inatin'me ata që gabojnë.'Inatin' e kam me ata që nuk reflektojnë dhe këmëngulin të dominojnë dhe të poshtërojnë.Po kë, qytetarët,profesoratin,idealistët,emigrantët,diasporën?.

Shto koment

Denonco