(Requiem  në 3 vjetorin e shpalljes Shenjte)

Si sot tre vjet më parë, të djelen me 4 shtator 2016, E lumja nënë Tereza, e shpallur shenjtënesha më e re e Kishës Katolike dhe e njerzimit mbarë, u shfaq në Sheshin "San Pietro" në Romë, në dimensionin e Shenjtes së Dashurisë dhe Mëshirës.

Ajo erdhi në këtë ditë të lume si "dërgatë" e kongregatës (Urdhërit) së Misionarëve të Bamirësisë. Një urdhër i krijuar prej saj dhe i miratuar prej Ipeshkvit të Kalkutës. Më pas Urdhëri miratohet edhe nga"Propagada Fide" në Romë dhe kështu ajo fiton "legalitetin" për të ndërtuar e perfeksionuar mbretërinë e saj të përshpirtëshme të dashurisë dhe mëshirës në tokë. Në fillim e përgjithmonë në Kalkuta të Indisë.

Por edhe  anë e mbanë botës, me prezencen e saj. Në 123 shtete, rreth 750 shtëpi bamirësie, në të cilat gëlojnë më se 4000 motrat me uniformën bardh e kaltër të kongregatës së bamirësisë. Pa shënuar këtu edhe shtëpitë e shërbesat e vëllezërve kontemplativë (soditës, kundrues).

Më pas, së bashku me Atë Sebastian Vazhakala ka themeluar edhe "Misionarët Laikë të Dashurisë", një lloj urdhëri i Tretë i Misionarëve të Dashurisë. Bashkëpunimi ynë me të na ka sjellë edhe në shqip, pas botimit në shumë gjuhë të botës kroniken e e përndritëshme pranë Nënës së Lume... (Atë Sebastian Vazhakala M.C "Jetë me Nënë Terezën-Miqësia ime tridhjetëvjeçare me nënën e të varfërve", Enti Botues "Gjergj Fishta", 2008)

Atë Sebastiani, njëri nga 6 vetët që mbante arkëmortin me kurmin e Nënë Terezës, në ditën kur nisi pavdekësia e saj, me 4 shtator 1997, është njëherësh edhe mbartës i shumë kujtimeve të rëndësishme, përshkruar në kronikën e kësaj miqësie hyjnore në 30 vite jete pranë Nënë Terezës.(shkruan Visar Zhiti në parathënien e librit).

Më pas... Më pas, kështu deri në në çastin që shkëputet prej botës së tokës drejt botës hyjnore të qiellit, pa u ndalur asnjëherë, në shërbesen e mëshirës për nevojtarët e gjithsojshëm e të gjithkundgjindëshëm (kudondodhur). Ajo i apelon njerëzimit, sot e përgjithmonë, nevojen e përjetëshme për më shumë dashuri ndërnjerëzore, për më shumë vëmendje prej të pasurve për më të varfërit e të varfërve, për më shumë drejtësi prej  atyre që kanë në dorë pushtet, për më shumë afri e mbështetje prej të fuqishmëve për të pafuqishmit, për më shumë buzëqeshje, si ilaç për dhimbjet.

-Ne s'mund të bëjmë dot gjëra të mëdha, vetëm gjëra të vogla me dashuri të madhe - do ta përsëriste shpesh si devizën e misionit të saj, Nënë Tereza-... Se gjërat e mëdha i bën tjetërkush...

Kur Nënë Tereza kishte fituar Çmimin Nobël të Paqes, siç rrëfen don Lush Gjergji, biografi i vetëm ndër shqiptarë, dëshmitar fatlum i ngjarjes së madhe, me 10 dhjetor 1979, ora 9.30 në Oslo i bën një vizitë mbretit Otavo i V-të i Suedisë. Pas përshëndetjes dhe një bisede të shkurtë, Nënë Tereza e pyeti mbretin: ”Madhëri, a do të jeni i pranishëm sot në ceremoninë e prezantimit të Çmimit Nobel ” ?

 - Unë, do të vija me dëshirë, por unë jam gjithmonë në qendër të vemendjes së njerëzve, prandaj nuk dua që edhe sot të ndodhë kjo. Sot është dita jote... Nuk dua që të jem në qendër të vëmendjes!- i përgjigjet Mbreti.

- Madhëri! Mos nguroni të vini- i thotë Nënë Tereza - në qendër të vëmendjes nuk do të jeni, as Ju e as unë. Aty ku është Zoti, nuk bie në sy mbreti!...Dhe për befasinë e të gjithëve, sidomos të organizatorëve pas spjegimit të saj dhe ftesës,kështu të arsyetuar të saj, mbreti ishte i pranishëm në ceremoni.

Shenjtërimi  i saj  vjen pas lutjeve të pandërprera kurrë, asnjëherë, për asnjë çast të vetëm.Vjen gjithashtu pas veprave të përditëshme e të përorëshme duke jua kushtuar gjithçka të përshpirtëshme të saj, të varfërve, të uriturve deri në pragvdekje, të pamundurve e të papërkrahurve.

Sipas ritualit kanonik shenjtërimi i saj vjen, pas shpalljes E lume trembëdhjetë vjet më parë, si mrekullibërëse, si shëruesja e një gruaje indiane të sëmurë me sëmundje të pashërueshme. Me vargun e paprerë të lutjeve, me shpirtin dhe me duart e sajë të imta.

Aty, në Sheshin "San Pietro" asohere ishim edhe ne bashkëkombas të saj, shqiptarë të ngadoardhur. Dhe u ndjemë ngrohtë, shumë ngrohtë nën mbulojen e shenjtërisë së saj. Si edhe të tjerët,  natyrisht. Patetika nuk vlen, heshtja më shumë. Dhe lutjet e saj për ne. Shenjtja jonë Tereze, lutu për ne mëkatarët, lutu për dashurinë e acaruar mes nesh, lutu dhe kërko mëshirë për të shtypurit nën pabarazinë.

Si në qiell, ashtu në tokë... Amen!

(Faxmile, marrë nga libri i d.Lush Gjergjit:E kam në zemër popullin tem shqiptar, “Drita”2019)