‘Solidaritet’ për fytyrën e nxirë të Edi Ramës

‘Solidaritet’ për fytyrën e nxirë të Edi Ramës

Nga Dritan Kaba - 17/04/2019

Hipokrizia më e madhe e prodhuar nga post-zjarri i Notre Dame, është pagesa e 100 mijë eurove nga taksat e shqiptarëve. Këto para po jepen vetëm për t’u përmendur emri Ramës, jo i Shqipërisë. Vendi më i varfër, i jep para shtetit që ka njerëzit më pasur të Evropës.

Ky nuk është solidaritet, se Franca nuk ka nevojë për paratë e vendit më të varfër në Evropë. Përkundrazi, ajo është fyerje për milionat e francezeve që po kontribuojnë për ringritjen e simbolit të tyre. Ka një shprehje popullore: Nuk mund të bësh sevap në xhami, kur nuk ke terezi në shtëpi.

Shqipëria ka shumë nevojë për ato para. Me aq para do siguroheshin kurat e dhjetëra të sëmurëve nga kanceri, që enden nëpër korridoret e spitalit pa marrë mjekim. Mund të shpëtohej jeta e disa fëmijëve të sëmurë me leuçemi. Mund të paguhej asistenca e dhjetëra familjeve në nevojë. Mund të bliheshin disa laboratorë për shkollat profesionale, mund të financoheshin pagesat e universiteteve  për mbi 300 mijë studentë, që nuk kanë mundësi ta paguajë dhe e braktisin shkollën për këtë arsye, duke marrë rrugët e emigrimit. Mund të restauroheshin disa kisha apo xhami.

Mund të ishin dëmshpërblyer dhjetëra fermerë të përmbytur, që qeveria rilindase edhe pse kanë kaluar mbi dy vite, nuk po i paguan për djersën e shkuar dëm.

Por karagjozi që kemi kryeministër do të bëjë show me paratë e shqiptarëve.

Po të ketë ‘ndjeshmëri’ dhe ‘dashuri’ për Notre Dame, të shesë vilat e tij të Surrelit dhe t’ia japë fondit të rindërtimit të Katedrales në Paris. Se si thonë fjalës tjetër popullore : Nuk mund të bëhesh xhymert me paratë e të tjerëve.

Taksat e bizneseve shqiptare, që vuajnë agoninë e falimentimit, kurrsesi nuk mund të përdoren nga Rama, për të ‘rregulluar’ imazhin e tij dhe të qeverisë më të korruptuar në Evropë. Ai, imazh është i nxirë shumë më tepër se trarët e djegur të Katedrales së Parisit. Kjo qeveri po nxin edhe shqiptarët. Paaftësia qeverisëse, lidhjet me krimin e organizuar nuk mund të zhbëhen me 100 mijë eurot e taksave të shqiptarëve.

© SYRI.net

Lexo edhe

Komentet

Askushi18/04/2019 11:32

E cjane 100.000 euro per Ramen? Droga , korrupjoni, pastrim parash, prona, i kane sjell rames para pa funde. Ai sot eshte sheiku i shqiperis. E ku do tja dij Rama per taxat e shqiptareve. Ky gangester i felliqur eshte e keqja e ketij vendi.

Shto koment

Denonco