Ajo quhet Xhisiela Maloku, është 25 vjeç dhe prej një muaji është personazhi kryesor i betejës politike mes mazhorancës dhe opozitës, mes Edi Ramës dhe Lulzim Bashës, mes arsyes dhe mashtrimit e mes propagandës dhe të vërtetës. Xhisiela Malokun u shfaq këtë të mërkurë në një sallë gjyqi ku as vetë i akuzuar për përndjekjen e 25 vjeçares, ish i dashuri i saj Rexhep Rraja nuk ishte i pranishëm.

Në të vetmin rast në botë, kur e dhunuara e faktuar me dokumenta mjekësorë si e tillë, nuk shkoi në sallë për të parë sesi fatmirësisht dhunuesi i saj do të mbetet në burg, por për të “shpresuar” se ai do të lirohej.

Propaganda, keqpërdorimi, shpërdorimi dhe marrja e peng e Xhisiela Malokut ka shkuar përtej. 25 vjeçarja e veshur nën tuta Adidas dhe syze 450 euro pala, nuk është sot një vajzë e masakruar nga ish i dashuri i saj, ky tmerr ka marrë fund për të paktën për aq kohë sa Rexhep Rraja do të jetë në burg.

Këtë të mërkurë edhe njëherë Xhisiela doli para mediave për të kërkuar që ta lënë rehat, kur në fakt askush nuk po e ngacmon. Sot Xhisiela kërkoi që ish i dashuri i saj të lirohej, kur të gjithë presin që ajo të kërkojë burgimin e tij. I gjithë kjo shfaqje pa kuptim, për një mendje normale njerëzore ka vetëm një shpjegim. Xhisiela Maloku ka lënë pas fundin e tmerrshëm të dhunës së Rexhep Rrajas, dhe tani i është nënshtrur tmerrit pa fund që pësojnë femrat që merren peng nga Edi Rama.

Edi Rama po u flet shqiptarëve përmes zërit, të Xhisielës, përmes imazhit të saj, përmes gjinisë së saj me shpresën se ata do ta besojnë. I vetmi ndryshim është veshja, sepse ndërsa Xhisielën e veshin me kostum Adidas 50 euro, vetëm çitjanet Yamamaoto të Edi Ramës i kushtojnë taksave të shqiptarëve 700 euro. Por ky është problemi më i vogël. Çështja është sesa herë Xhisiela Maloku del para mediave, aty për aty të fanepset sikur Edi Rama po lëçitet me veten. Kërcënimi i Xhisiela Malokut për padi me shpifje ndaj kujtdo që merret me jetën e saj, nuk është asnjë fjalë e ndryshme me valën proapgandistike të Edi Ramës për paktetën-antishpifje. Mungoi vetëm që Xhisiela të deklaronte se paratë e fituar nga paditë do t’ia kalonte fondit të edukimit, që Dorian Grei ynë kryeministër të kishte të gjithë alibinë për të çjerrë pikturën me imazhin e tij të shëmtuar.

Duke artikuluar njësoj si Edi Rama, Xhisiela Maloku ka filluar të fitojë pak nga pak antipatinë e opinionit publik. Janë gjithnjë e më të shpeshta rastet kur vajzën të cilën e mëshiruam 3 javë më parë, disa prej nesh kanë filluar të përbuzin, ta anatemojnë për makinën Peugeot me të cilën u shfaq fill pasi automjetin e mëparshëm ia shkatërruan me tritol. Po e përflasin për syzet 450 euro të cilat duket që ata ia kanë blerë në nxitim e sipër, ia kanë marrë disa numra më të mëdhenj sesa koka e saj që mezi i mban, nën udhërin “bëj prove e hiqi”. Dijeni sesa herë përçmoni Xhisielën, në fakt po neverisni Edi Ramën, sa herë anatemoni vajzën e gjorë nga Nikla, në fakt po përbuzni djallin me brirë nga Surreli.

Duhet vetëm pak përqëndrim, kërkohet vetëm pak durim, nevojitet vetëm pak qetësi për të kuptuar sa herë flet Xhisiela Malokun, në fakt po dëgjoni Edi Ramën. Mos e lejoni mallkimin e “çudisë së 3 ditëve” të na e shesë sapunin për djathë. Sot Xhisiela Maloku është internuar brenda një palë syzesh dhe një kostumi Adidas, të cilat njësoj se rrobat e atyre që u internuan gjatë regjimit komunist nuk kanë asnjë ndryshim. Xhisiela Maloku është po e njëjta femër që 4 muaj më parë masakrohej me cigare në lëkurë nga ish i dashuri i saj, është po e njëjta vajzë që shkoi në dy komisariate për denoncuar djalin e babës së vet deputet socialist, sepse asnjë polic në Fushë-Krujë nuk kishte guximin të vendoste firmën mbi proces-verbal. Është e njëjta vajzë për të cilën ekspertiza mjeko-ligjore ka vërtetuar se në trupin e saj ishin akoma të freskëta hematomat e një dhune barbare e një djali që e konsideronte si pronën e saj.

Për të kuptuar sesi funksionon kapja e Edi Ramës ndaj Xhisielës, mjafton të shikosh qëndrimin e Babales në intervistën e fundit në Open. Ai i qëndroi versionit të tij sesi zëri i Agron Xhafajt nuk është zëri i Fredi Alizotit. Dhe garancinë për këtë qëndresë atij ia garanton vendimi i gjykatës së pavarur të Prishtinës. Xhisiela Maloku në Nikël nuk e ka këtë luks, aq më pak kur pa sesi makina e saj fluturoi në ajër pas tritolit të para disa ditëve. Në Shqipërin e Edi Ramës, neve na lejohet të besojmë vetëm te vërtetën e tij. Vetëm jashtë tokës së sunduar prej tij ne mund të mësojmë se në cfarë katandie kemi katandisur si popull. Dhe kur ti rikujtoni sërish këto fakte, mendojeni për në cast sikur ajo të ishte edhe vajza juaj…, e marrë peng nga Edi Rama!