Oktapodët mund të përdorin pasqyrat për të gjetur prenë e fshehur

Një studim i ri ka treguar se oktapodët mund të përdorin pasqyrat për të gjetur prenë e fshehur, një aftësi që deri tani ishte vërejtur vetëm te kafshët me shtyllë kurrizore. Studiuesit nga DartmouthCollege zbuluan se këta jovertebrorë janë në gjendje të interpretojnë reflektimet dhe t’i përdorin ato për t’u orientuar në hapësirë.

Në eksperiment morën pjesë tre oktapodë kalifornianë me dy njolla. Fillimisht ata u trajnuan duke u treguar një gaforre të vendosur pas një pengese, e dukshme vetëm përmes pasqyrës. Në fillim, oktapodët përpiqeshin t’i afroheshin drejtpërdrejt reflektimit, por pas 10–12 provash mësuan të shkonin te vendndodhja reale e presë.

Në fazën kryesore të studimit, studiuesit përdorën një imazh virtual të një gaforreje të projektuar në ekran. Oktapodët nuk mund ta shihnin drejtpërdrejt objektivin dhe duhej të mbështeteshin vetëm te reflektimi në pasqyrë. Për të marrë shpërblimin, një gaforre të vërtetë, ata duhej të ktheheshin 180 gradë dhe të zgjidhnin anën e duhur të rezervuarit.

Të tre oktapodët arritën ta kryenin detyrën me sukses në rreth 73 për qind të rasteve. Në shumë prova, ata zgjodhën rrugë më të shkurtra dhe më të ndërlikuara, duke u larguar nga reflektimi për të arritur objektivin. Sipas studiuesve, kjo sugjeron se kafshët mund të kenë krijuar një përfaqësim mendor të hapësirës, diçka të ngjashme me një “hartë” të brendshme.

Oktapodët janë të ndarë nga vertebrorët prej më shumë se 520 milionë vitesh evolucioni dhe kanë sisteme nervore shumë të ndryshme. Megjithatë, ata njihen për inteligjencën e tyre të lartë, aftësinë për të zgjidhur probleme dhe për të përdorur mjete.

Megjithëse studimi u krye vetëm me tre individë dhe nevojiten kërkime të tjera për ta konfirmuar, rezultatet sugjerojnë se aftësia për të përdorur pasqyrat si mjet orientimi mund të jetë zhvilluar në mënyrë të pavarur në grupe të ndryshme kafshësh. Kjo tregon se zgjidhje të ngjashme njohëse mund të lindin përmes rrugëve krejtësisht të ndryshme evolucionare. / Earth – Syri.net