Arkeologët kanë zbuluar ngjashmëri intriguese mes sjelljes së homosapiensëve dhe neandertalëve, një prej të afërmve tanë më të afërt të zhdukur.

Në një studim të botuar në Journal of Archaeological Method and Theory, një ekip studiuesish të udhëhequr nga Amélie Vallerand e Departamentit të Antropologjisë të Universitetit të Montrealit, gjetën paralele të habitshme mes mënyrës sesi neandertalët dhe njerëzit modernë e përdornin hapësirën në banesat e tyre.

Neandertalët (Homo neanderthalensis) ishin një specie njerëzore që jetoi në Euroazi deri në zhdukjen e tyre rreth 40,000 vjet më parë. Në rajone dhe periudha të caktuara, ata bashkëjetuan me njerëzit anatomikisht modernë - madje u shartuan me ne.

Tradicionalisht, ekspertët e konsideronin sjelljen e neandertalit si më pak komplekse se ajo e specieve tona. Por gjatë dekadave të fundit, një numër në rritje provash e kanë sfiduar këtë pikëpamje, me kërkime që tregojnë se aspektet e sjelljes së neandertalit ishin të krahasueshme në kompleksitet dhe diversitet me homosapiensët parahistorikë.

Studimi i fundit e mbështet më tej këtë pikëpamje, duke detajuar dëshmitë e ngjashmërive në mënyrën se si njerëzit modernë dhe neandertalët e përdornin hapësirën.

Autorët e studimit shkruajnë: "Për shkak se shpesh supozohet se ndryshimet themelore të sjelljes i dallojnë neandertalët dhe homosapiensët, aftësia për të strukturuar hapësirën brenda vendeve që ata pushtuan në zona të veçanta aktiviteti shpesh cilësohet si një tipar dallues kryesor i specieve tona.

"Megjithatë, kjo sjellje nuk është vlerësuar kurrë për të dy grupet në një vend të vetëm, duke penguar krahasimet e drejtpërdrejta deri më sot," thanë autorët.

Për të ndihmuar në zgjidhjen e kësaj çështjeje, ekipi analizoi artefakte dhe veçori nga siti Riparo Bombrini në Italinë veriperëndimore - një strehë shkëmbore e shembur që ruan prova të vendbanimeve nga neandertalët dhe, më pas, homosapiensët. Kjo analizë zbuloi modele të përbashkëta të vendbanimeve mes dy popullsive.

Studiuesit hartuan shpërndarjen e veglave prej guri, eshtrave të kafshëve, okrën dhe guaskat e detit në të gjithë sipërfaqen e zonës. Kjo u mundësoi atyre të identifikonin grupime të dallueshme të artefakteve dhe materialeve, të cilat ndihmuan për të hedhur dritë mbi sjelljet e grupeve të ndryshme që jetonin në vend.

Midis gjetjeve, studiuesit përcaktuan se si neandertalët ashtu edhe homosapiensët shfaqën një përdorim të strukturuar të hapësirës, duke organizuar zonat e tyre të jetesës në zona të dallueshme aktiviteti me intensitet të lartë dhe të ulët. Këto zona të veçanta u përdorën për aktivitete të ndryshme.

Sipas autorëve të studimit, kjo sugjeron që neandertalët dhe njerëzit modernë ndanin kapacitete të krahasueshme njohëse për organizimin hapësinor.

"Si homosapiensët, neandertalët organizonin hapësirën e tyre të jetesës në një mënyrë të strukturuar, sipas detyrave të ndryshme që u zhvilluan atje dhe sipas nevojave të tyre," tha Vallerand në një deklaratë për shtyp. "Pra, ky është një studim tjetër që tregon se neandertalët ishin më "njerëzorë" nga ç'mendohet në përgjithësi."