Vikingët kanë zbuluar Amerikën shumë përpara se të mbërrinte Christofer Cololombi. Shkencëtarët kanë ekzaminuar disa korniza druri, te gjetura në majën veriore të ishullit të Newfoundland në Kanada, që dëshmojnë se Vikingët kishin arritur të parët në Botën e Re.

Kjo do të thotë se vendbanimi, u pushtua në vitin 1021 pas Krishtit, saktësisht një mijëvjeçar më parë dhe 471 vjet përpara udhëtimit të parë të Kolombit.

"Shumë lavdërime duhet t'u shkojnë këtyre evropianëve veriorë për të qenë shoqëria e parë njerëzore që përshkoi Atlantikun," tha gjeoshkencëtari Michael Dee nga Universiteti i Groningenit në Holandë, i cili drejtoi studimin e botuar në revistën “Nature”.

Udhëtimi Viking përfaqëson arritje të shumta për njerëzimin. Vendbanimi shënon vendin ku globi u rrethua përfundimisht nga njerëzit, të cilët mijëra vjet më parë kishin ecur në Amerikën e Veriut mbi një urë tokësore që dikur lidhte Siberinë me Alaskën.

Vikingët, ose njerëzit nordikë, ishin detarë me atdheun skandinav: Norvegjinë, Suedinë dhe Danimarkën.

Ata kaluan nëpër Evropë, ndonjëherë duke kolonizuar dhe herë të tjera duke bërë tregti ose bastisje. Ata zotëronin aftësi të jashtëzakonshme për ndërtimin e anijeve dhe lundrimin dhe krijuan vendbanime në Islandë dhe Grenlandë.

"Unë mendoj se është e drejtë të përshkruhet si një udhëtim zbulimi dhe një kërkim për burime të reja të lëndëve të para," tha Dee.

Epoka e Vikingëve është përcaktuar tradicionalisht si 793-1066 pas Krishtit, duke paraqitur një gamë të gjerë për kohën e kalimit transatlantik.