Është riaktivizuar sërish zjarri në fshatin Konisbaltë në bashkinë Dimal. Edhe këtë herë zjarri është vënë nga persona ende të paidentifikuar dhe vatra e parë e zjarrit ndodhet në zonën e Allaxhiasit, pak metra larg nga vatra e zjarrit e vendosur dy ditë më parë.

Zjarri po përparon drejt pyllit me pisha, i favorizuar nga era dhe temperaturat e larta. Për shkak të terrenit të vështirë, në ndihmë të zjarrfikësve të Dimalit janë nisur 3 mjete zjarrfikëse nga Berati dhe forca të ushtrisë.

Terreni i vështirë e bën të pamundur futjen e mjeteve zjarrfikëse drejt zonës së zjarrit dhe zjarrfikësit dhe forcat e ushtrisë janë duke shuar flakët me pompa uji shpine dhe mjete rrethanore.

Ndërkohë që zjarrfikësit janë duke luftuar me flakët për të neutralizuar zjarrin, policia po punon për identifikimin dhe kapjen e autorëve të zjarrit, që është vendosur qëllimisht për të dytën herë në të njëjtin vend.