Banesat e dy vëllezërve, Xhemal dhe Ibrahim Isaku në Qerret të Labinotit Mal në Elbasan janë shkrumbuar totalisht nga zjarri, duke lënë në qiell të hapur 9 anëtarë.

Teksa me lot në sy tregojnë kushtet e vështira me të cilat janë duke u përballur, familjarët bëjnë apel për ndihmë.

SYRI TV

Flakët e zjarrit kanë shkrumbuar banesat e dy vëllezërve, Xhemal dhe Ibrahim Isaku në Qerret të Labinotit Mal. Dy familjet me 9 anëtarë, tashmë ndodhen në qiell të hapur.

Familjarët nuk kanë mundur të shpëtojnë asgjë, madje as drithin me të cilin ushqehen e as veshmbathjet. Me lot në sy Xhemal Isaku dhe bashkëshortja e tij apelojnë për ndihmë e tregojnë kushtet e vështira me të cilat janë duke u përballur.

Babai i Xhemalit Imer Isaku me lot në sy shpreh pikëllimin nga situata. Ai ka vështirësi me shikimin prej disa vitesh dhe në momentin e rënies së zjarrit e kanë nxjerrë në krahë.

Pranë familjes ka qenë edhe deputeti i zonës Qani Xhafa i cili u bëri apel instancave, veçanërisht bashkisë Elbasan, të ngrejë një komision për vlerësimin e dëmit dhe kompesimin e familjeve.

Familjarët e prekur nga kjo fatkeqësi i bëjnë apel shtetit dhe të gjithë shqiptarëve për t’i ndihmuar sado pak.