Ngjarja e rëndë e pak ditëve më parë në një fshat të Gramshit ende nuk është zbardhur nga Policia dhe Prokuroria lokale.

Prokuroria ka bërë me dije se personi që kreu masakrën duke vrarë të vëllanë dhe bashkëshorten nuk është në gjendje të mirë mendore e për pasojë ai duhet të kontrollohet mendërisht, por pistën e problemeve me shëndetin mendor mësohet se e ka hedhur poshtë djali i viktimës, pra nipi i tij.

Veç të tjerave ai hedh poshtë edhe pistën e moralit që ka pretenduar në krye të herës vetë i moshuar autor i asaj ngjarjeje. Kështu, nipi i Xhevit Sinanit ka folur pas krimit të rëndë në Gramsh, ku i moshuari vrau gruan dhe vëllain e tij.

Djali i viktimës, Shaqir Sinanit, i cili u godit për vdekje me sëpatë nga i vëllai tha se ngjarja kurrsesi nuk ka pasur motive xhelozie, duke kërkuar “mos ma njollosni babanë tim”.

Ai rrëfeu në emisionin “Me zemër të hapur”, se xhaxhai kishte marrë në telefon fëmijët e tij dhe u ka thënë “hajdeni lart, sepse u kam vrarë mamanë dhe xhaxhain”. Ndërsa theksoi se nuk dinë arsyet e ngjarjes dhe se me fëmijët e autorit s’kanë asnjë problem. “Nuk kemi fjalë, për çdo gjë në shtëpi, gëzim e hidhërim, ishte xhaxhai i pari (autori i vrasjes).

Nuk më ka thënë njeri që vuan nga shëndeti mendor. Nuk di nëse kanë pasur probleme në çift mes xhaxhait dhe gruas së tij, ishte zonjë grua, e respektueshme. Nuk kishin probleme. S’kemi dëgjuar gjë”, u shpreh ai.

Pyetjes se si ndodhi ngjarja, iu përgjigj: “Nuk i bënte dot babait tim drejt për drejt, e ka kapur në befasi. S’kemi informacion, sepse nuk ka parë asnjë njeri se çfarë ka ndodhur. Policia ka arritur. Ai ka marrë familjarët, ‘hajdeni lart sepse u kam vrarë mamanë dhe xhaxhain’. Djali i vogël i xhaxhait ka marrë kryeplakun. Ai më pas ka njoftuar Policinë. Nuk e besonte njeri që mund të vriste gruan e vet dhe vëllain e vet. Babanë tim e njihte një Shqipëri e tërë. Xhaxhai im ishte njeri serioz, me kulturë. Nuk ia merr mendja njeriu që ka bërë një krim të tillë, s’ka shpjegim. Ne si fëmijë me kushërinjtë, jemi siç kemi qenë. S’kemi pasur probleme dhe s’do kemi, për xhaxhain ta zgjidhi shteti. S’kanë faj ata. Mos ma njollosni babanë tim, ai iku, por të mos të iki me njollë. Nuk është punë xhelozie, nuk ishte i asaj rruge. Asnjë nga ne si familje”.