Biznesmeni Lulzim Masha, i cili pak ditë më parë i shpëtoi një atentati në liqenin Artificial, ka kërkuar mbrojtje nga shteti.

Në dëshminë e tij paraprake,  biznesmeni fillimisht mohoi të ishte objektiv i ndonjë atentati, por më pas është rimarrë ne pyetje dhe ka pranuar se një person e ka vëzhguar.

Në dëshminë e dhënë përpara grupit hetimor, Masha është shprehur se për gati një javë është ndjekur dhe mbajtur në vëzhgim nga një person.

Sipas tij, këtë person e ka vërejtur pranë shkollës që ai administron, por nuk i ka shkuar ndërmend se mund të ketë qenë objektiv i ndonjë atentati, pasi nuk ka konflikt me njëri.

Gjithashtu, ai ka përshkruar përpara hetuesve edhe personin që qëlloi drejt tij.

Sipas biznesmenit autori ka qenë i moshës rreth 25- deri në 30 vjeç, i cili ka qenë i veshur me patallona xhinse, esmer me pak mjekër si dhe mbante veshur një kapele, ngjyrë të zezë.

Sipas hetimeve dhe këqyrjeve që i është bërë mjetit me të cilin po lëvizte biznesmeni ai është prekur vetëm nga një plumb.

Mes personave që janë marrë në pyetje përveç dëshmitarëve okularë dhe objektivit, në pyetje është marrë dhe vëllai i këtij të fundit, pasi ai rezulton person me precedent pasi shumë vite më parë, është dënuar me 15 vite burg për vrasje, dhe hetuesit kanë dyshime mos atentati është bërë për hakmarrje.

Por deri më tani nuk ka asnjë të dhëne.