Prokuroria e Posaçme SPAK ka zgjeruar hetimet edhe në 6 tendera të tjerë në lidhje me korrupsionin me tenderin në RTSH, ku i përfshirë ishte edhe ish-drejtori Thoma Gëllçi.

Gazetarja e Top Channel, Anila Hoxha është shprehur se veç tenderit të dyshimtë, në përfundim të të cilit u blenë pajisje për RTSH AGRO, nën hetim janë edhe 6 tendera të tjerë që është e përfshirë RTSH, sipas Hoxhës.

“SPAK i referohet një kallëzimi të kompanisë që u skualifikua nga kjo garë. Vepër për Gëllçin është ‘shpërdorim detyre’ në lidhje me shkeljen e afateve 45 ditore që ishin vënë si kusht. Brenda 45 ditëve duhej të ekzekutohej. Në momentin që përfundon afati Gëllçi nënshkruan një shtesë afati duke e shtyrë përtej limiteve, ndërkohë që evidenton shkelje të tjera që RTSH Agro është evidentuar nga ama 2 vite nga hapja e procedurave të tenderit. Janë edhe disa shkelje që përcaktohen të jenë teknike. Momentet e fundit SPAK ka dërguar një urdhër tjetër. Ka zgjeruar hetimet sa i takon RTSH. Është dërguar një sekuestro dokumentesh për shkelje të barazisë. Kërkon të sekuestrohet e gjitha pjesa e tenderit. SPAK ka zgjeruar hetimet edhe për tendera të tjerë për kërkesë të RTSH, janë 6 tendera me praktikë objekt”, tha Hoxha.

Gjyqtarja e posacme Flora Hajredinaj e konsideroi të bazuar verdiktin që kishte shpallur më herët në mungesë ndaj ish drejtorit të përgjithshëm të RTSH, Thoma Gëllçi dhe me këtë arsyetim e dërgoi në paraburgim nën masën arrest me burg.

Në qeli u dërguan edhe dy vartësit e tij Julian Tapia dhe Ervin Muraj , ndonëse secili prej tyre kërkoi masë më të lehtë me propozimin e bllokimit të pasaportës dhe të lëvizjeve jashtë vendit.

Ndërkohë vijon në kërkim anëtari i tretë i komisionit Alban Malaveci, që vendosi për tenderin e dyshimtë, në përfundim të të cilit u blenë pajisje për RTSH AGRO me fond limit gati 860 milionë lekë.

Gëllçi i dyshuar për shpërdorim detyrë deklaroi se nuk ka kryer asnjë vepër penale, kurse avokati i tij insistoi se hetimi dhe arrestimi u krye për ta ndaluar ish-zyrtarin që të rikandidonte për të njëjtin pozicion.

SPAK këmbëngul se Gëllçi që ishte numri një i TVSH deri në muajin maj, shpërdoroi detyrën mbas një tenderi të hapur në dhjetor 2018 dhe që sipas kushteve në kontrate operatori ekonomik duhet të blinte pajisjet brenda 45 ditëve mbasi shpalljes si fitues.

Por ish-drejtori i përgjithshëm dyshohet nga Prokuroria e Posaçme se nënshkroi një afat të dytë përtej asaj që ishte rënë dakord.

Tre të tjerët dyshohen se shkelën barazinë në tendera duke skualifikuar firmën e cila më pas jo vetëm u ankua por edhe kallëzoi në prokurori.