Gazetarja investigative, Klodiana Lala ka dhënë detaje të reja për vrasësin e Everest Çakajt, pas ngjarjës së rëndë që tronditi mbrëmjen e djeshme qytetin e Elbasanit.

Lala tha në Opinion se një dëshmitar që po ruhet nga policia ka parë momentin e vrasjes dhe e ka përshkruar vrasësin përpara policisë, duke thënë se ishte me trup të mbushur, jo shumë i gjatë dhe tepër i shkathët.

Everest Caka u ekzekutua mbrëmjen e djeshme në lagjen Skënderbej në Elbasan, teksa ndodhej në makinë me gruan e tij, Silvana Çaka, e cila po ashtu mori një plumb në dorë por është jashtë rrezikut për jetën.

Të paktën 15 plumba janë qëlluar në trupin e Everest Çakajt, ndërkohë vrasja dyshohet se ka lidhje me të shkuarën e errët të 41 vjeçarit.

“Do të jap detajet e nje dëshmitari që po mbrohet nga policia. Në momentin që është goditur, Everesti ka ndaluar sepse ka menduar se është një aksident. Ose është përdorur pistoletë me silencator ose armët e shkurtra. Është qëlluar me 15 plumba dhe kanë dashur të jenë të sigurtë që ka ndërruar jetë. Rezulton që autori i dyshuar i ngjarjes është një person i njohur i zonës. Aty jashtë është një person, emrin nuk mund ta zbuloj dot, sepse është dëshmitar që policia e konsideron të rëndësishëm. Ai thotë, personi që ka dalë është një person i mbushur, jo shumë i gjatë dhe i ka lëvizur në mënyrë precize. Ka qëlluar dhe më pas është larguar pa shkëmbyer asnjë fjalë. Dëshmitari ka dhënë një identitet dhe policia ka një panoramë si është vrasësi”, tha Lala.