Zbardhen detaje të reja nga biznesmeni italian Davide Pecorelli, 45 vjeç, i cili vijon të jetë i zhdukur prej më shumë se 10 ditësh në vendin tonë, në rrethana ende të paqarta.
Në makinën e djegur në Pukë, e cila ishte marrë me qira nga biznesmeni, janë gjetur 2 kocka të cilat dyshohet se janë të tij. Kockat janë dërguar për ekzaminim në laboratorin kriminalistik në Tiranë dhe pritet të dalë përgjigja e AND.
Mediet italiane kanë zbardhur mesazhin e fundit që ai u kishte dërguar punonjësve gjatë pushimeve të Krishtlindjeve.
“Do të kthehem rreth 10 janarit”, ishte ky mesazhi i fundit për disa punonjës.
Sipas medieve italiane, hetimet po ndiqen nga Interpoli. Partnerja shqiptare e biznesmenit italian raportohet se ka dorëzuar disa gjëra personale te policia shqiptare, të nevojshme për të bërë krahasimet e ADN-së.
“Nuk e di nëse Davide ka shkelur gishtat e dikujt,” raportohet se ka thënë partnerja e tij përpara punonjësve të sallonit të bukurisë në pronësi të italianit të zhdukur.
Ajo ishte e prekur kur shpalli zhdukjen e 45-vjeçarit.
Italiani ishte pronar i një hoteli dhe një rrjeti qendrash bukurie. Ai kishte qenë në të shkuar arbitër në kategoritë e ulëta të futbollit italian.
© SYRI.net