Një burrë 42 vjeç, Nardi Xhukellari, ka humbur jetën në fshatin Vërdovë të Pogradecit mëngjesin e së hënës për shkak të zjarrit.
Ngjarja ka ndodhur në orën 6:00 të ditës së sotme. Burri dukej se jetonte vetëm në shtëpinë dykatëshe të rrënuar dhe flinte në katin e dytë. Sipas burimeve, ai vuante nga probleme të shëndetit mendor.
Policia ka shkuar në vendin e ngjarjes dhe ka nisur hetimet për shkaqet e shpërthimit të zjarrit, që dyshohet se u shkaktua nga një shkëndijë elektrike.
Pogradec/Informacion paraprak
Më datë 18.01.2021, rreth orës 06:00, në fshatin Vërdovë, Pogradec, ka rënë zjarr në një banesë, në katin e dytë të së cilës jetonte i vetëm shtetasi N. Xh., 42 vjeç, i cili për pasojë ka gjetur vdekjen.
Grupi hetimor dhe shërbimet e zjarrfikëses ndodhen në vendngjarje, ku po punohet për të përcaktuar shkaqet e rënies së zjarrit dhe zbardhjen e rrethanave të ngjarjes.
© SYRI.net