Media greke vazhdon t'i kushtojë një rëndësi të veçantë ekzekutimit të shqiptarit Edmond Llangozi, disa ditë më parë, ku u plagosën edhe dy djemtë e tij për një borxh prej 600 eurosh.

Sikundër mësohet nga mediat fqinje, autori i krimit është një shtetas shqiptar nga Lezha.

Deri më tani ky person njihet me emrin Soni dhe shkak për masakrën ishte borxhi që kishte një prej djemve të viktimës.

Lezhjani bashkë me 5 persona të tjerë kishin shkuar në një prej lokaleve në zonën e Agios Sostis për të marrë borxhin te familja Llangozi.

Këtu palët janë konfliktuar fillimisht verbalisht, por më pas situata ka agravuar në përdorimin e armës së zjarrit.

Autori i dyshuar ka shkrepur pistoletën drejt djalit që kishte marrë borxhin, por para armës ka dalë 54-vjeçari, i cili mori 4 plumba, njëri prej të cilëve e goditi në zemër.

Si pasojë e ngjarjes mbetën të plagosur dhe dy djemtë Anxhelo dhe Mihal Llangozi të cilët pas ndihmës mjekësore ndodhen jashtë rrezikut për jetën.