Policia austriake kontrolloi 18 banesa dhe arrestoi 14 persona të martën, pasi një person i armatosur i identifikuar si një xhihadist, vrau katër persona në qendër të Vjenës brenda natës.

Personi i armatosur, i cili u vra nga policia disa minuta pasi hapi zjarr në lokalet e mbushura me njerëz, ishte liruar nga burgu më pak se një vit më parë.

Një burrë dhe grua e moshuar, një kalimtar i ri dhe një kameriere u vranë dhe 22 njerëz, duke përfshirë një polic u plagosën, tha Ministri i Brendshëm Karl Nehammer në një konferencë për shtyp.

Kryebashkiaku i Vjenës tha se tre persona ishin ende në gjendje kritike.

Në një fjalim televiziv, Kancelari Sebastian Kurz u tha austriakëve: “Ky nuk është një konflikt midis të krishterëve dhe myslimanëve ose midis austriakëve dhe migrantëve. Jo, kjo është një luftë midis shumë njerëzve që besojnë në paqe dhe atyre pak (që e kundërshtojnë atë). Është një luftë midis civilizimit dhe barbarisë ”.

Sulmi pasoi menjëherë pas sulmeve vdekjeprurëse nga sulmuesit islamikë në Nice dhe Paris, ku disa myslimanë janë zemëruar nga botimi i karikaturave satirike të Profetit Muhamed.

Në Paris, Presidenti francez Emmanuel Macron shkoi në Ambasadën Austriake për të shkruar një mesazh ngushëllimi në gjermanisht që lexonte: "Në gëzim dhe në hidhërim, ne do të qëndrojmë të bashkuar"./ Reuters/