Policia italiane ka zbuluar një laborator droge në brendësi të një kapanoni industrial të baktisur në Cusago, periferi në perëndim të Milanos. Një shqiptar, 61 vjeç, ka përfunduar në pranga, i akuzuar për shitje lëndësh të ndaluara.
Deri te zbulimi i laboratorit në kapanon u arrit pas një serie të gjatë vëzhgimi e gjurmimi të shqiptarit, i cili ishte parë të hynte shpeshherë atje.
Policët e ndaluan për kontroll dhe i gjetën një gram kokainë, tre telefona celularë, 185 euro dhe një tufë çelësash. Këta të fundit i përkisnin fabrikës së braktisur që ishte shndërruar në laborator për përzierjen dhe konfeksionimin e drogës, me të gjitha mjetet e nevojshme për kryerjen e punës.
Para kontrollit brenda stabilimentit u kontrollua një makinë e parkuar pranë ndërtesës dhe poshtë njërës prej rrotave u gjet një qese me 11 gramë kokainë. Brenda makinës u zbuluan 18.6 kile heroinë, gjysmë kile kokainë, 9 gramë marijuanë e tetë kile lëndë përzierëse, si dhe 48 mijë euro.
Kontrolli në banesën e shqiptarit solli zbulimin e dy mijë eurove të tjera, disa blloqe me shifra mbi aktivitetin, një tjetër celular dhe një peshore e vogël.
© SYRI.net