Patrullat e policisë po aplikojnë forma të ndryshme kontrolli duke përdorur të gjitha mjetet teknike për matjen e shpejtësisë dhe nivelin e alkoolit tek shoferët. Në aksin Tiranë-Durrës-Tiranë dhe Sauk-Teg-Kashar policia ka ushtruar kontrolle me radar mbrëmjen e së premtes.

U konstatuan shpejtësi tej normave të lejuara, nga 137 deri ne 152 km/h  në rrugë në orët kur fluksi i mjeteve vijon të jetë ende i lartë.

Për 4 orë kontroll me radar u pezulluan 12 Leje Drejtimi për shpejtësi nga 137 km/h deri ne 152 km/h. 

Ndërsa gjatë 24 orëve të fundit në të gjithë vendin gjatë monitorimit me radar të rrugëve urbane dhe interurbane, nga ana e Policisë Rrugore janë pezulluar 103 Leje Drejtimi për shpejtësi që varionte deri në 170 km/h.

Ndërkohë deri tani gjatë kontrolleve duke përdorur alkooltestin, në të gjithë vendin janë arrestuar 7 drejtues mjetesh që drejtonin mjetin në gjendje të dehur.

Një kombinim sa i frikshëm aq dhe i rrezikshëm për sigurinë rrugore dhe atë publike, një automjet qe drejtohet nga drejtues nën efektin e alkoolit dhe më keq akoma në gjendje të dehur apo me shpejtësi mbi normat e lejuara deri në dyfishin e limit që lejon tabela është një rrezik potencial për jetën e drejtuesit të mjetit dhe këdo që përdor rrugën.