Hekuran Billa u qëllua për vdekje mbrëmjen e të enjtes në afërsi të Komunës së Parisit. Ai ishte në lëvizje, me makinën e tij tip BMW X6 kur u qëllua në lëvizje. Viktima me origjinë nga Kukësi, mori plagë në kokë dhe në trup nga breshëria e automatikut.

Sipas policisë, Billa jetonte në fshatin Domje, ndërsa pas marrjes në pyetje të familjarëve ai kishte ardhur për të takuar disa miq të tij në zonën e Komunës së Parisit. Autorët u larguan menjëherë nga vendngjarja, dhe rreth 30 minuta më pas, Policia gjeti në fshatin Pezë dhe makinën e autorëve.

Motivet e ekzekutimit janë ende të paqarta për hetuesit, por dyshimi kryesor mbetet hakmarrja. Kjo për shkak se 40-vjeçari, i njohur edhe me emrin, Herland Bilali në Angli, në vitin 2006 vrau me breshëri në një lokal Prel Markun, ndërsa la të plagosur tre persona të tjerë, Petrit Brahon, Agron Gjonin dhe Musa Rrahmanin.

Në atë kohë, Billa, ishte 28 vjeç, ndërsa viktima, 22. Vendimi i gjykatës angleze u njoh nga drejtësia shqiptare, dhe për pasojë, 40-vjeçari u ekstradua drejt Shqipërisë, në vitin 2014 për të vuajtur dënimin me burgim të përjetshëm.

Në Shqipëri Billa kërkoi një tjetër proces gjyqësor për njohjen e vendimit. Fillimisht ai u refuzua, por pas kërkesës së bërë në vitin 2017 gjykata shqiptare ia konvertoi burgimin e përjetshëm me 25 vite burg, duke u bazuar në legjislacionin shqiptar, për veprat penale që akuzohej. Pasi mori këtë vendim 1 vit më pas Billa bëri sërish një kërkesë në gjykatë për t’u liruar me kusht.

Hekuran Billës i kishin mbetur edhe 5 vite burgim që ishte konvertuar nga gjykata me kusht. Billa kishte paraqitur në gjykatë një kontratë pune me një studio ku premtonte se do punonte si korrier dhe se do sillej mirë.

Vendimi për të rezulton se u ndryshua në datën 22 shkurt 2019, pasi Billa nga burgu pretendonte se kishte prindërit sëmurë dhe se ata nuk kishin të ardhura veç pensionit për të jetuar.

Viktima kishte dorëzuar sipas burimeve raporte mjekësore duke lënë në këtë mënyrë qelinë.

Sipas kërkimeve në faqet zyrtare të QKR-së, 40-vjeçari rezulton të ketë aktiv dhe një biznes të tijin në Tiranë, ku jep makina me qira. Deri më tani, Policia nuk ka asnjë të dhënë për vrasësit ndërsa dyshohet se automjeti është i vjedhur ndërsa arma e krimit nuk ka gjurmë pas djegies.