Policia e Tiranës, Interpol Tirana dhe Interforza Italiane zbuluan dhe arrestuan në Tiranë një supergrabitës të dënuar me dhjetë vjet nga drejtësia italiane dhe që i fshihej asaj.

I arretsuari është Shkëlqim Çela (Çypi) i lindur në banues në Luz të Fushë Krujës dhe që kishte ndryshuar emrin disa herë si Arian KontiI, alias Fatjol Perleka, alias Shkelqim Qypi, 40 vjeç.

Ai ishte dënuar në Itali me 10 vite burg për "Vjedhje në rrethana rënduese”.

NJOFTIMI

Policia Tiranë, ZQK Interpol Tirana, Departamentit të Policisë Kriminale dhe autoriteteve policore Italiane - misionit INTERFORZA njoftuan se u bë i mundur lokalizimi në qytetin e Tiranës i një personi të kërkuar nga drejtësia italiane.

Mbi bazën e këtyre informacioneve, nga Sektori i Operacioneve dhe Kërkimit në Drejtorinë Vendore të Policisë Tiranë, u organizua dhe finalizua operacioni policor i koduar "Alias", në kuadër të të cilit u bë kapja dhe prangosja e shtetasit të shpallur në kërkim ndërkombëtar Shkëlqim Çela (Çypi), alias Arian KontiI, alias Fatjol Perleka, alias Shkelqim Qypi, 40 vjeç, lindur dhe banues në fshatin Luz, Fushë Krujë.

Ky shtetas ishte shpallur në kërkim ndërkombëtar nga autoritetet italiane, pasi Gjykata e Udines në Itali e ka dënuar me 9 vjet, 11 muaj e 20 ditë burg, për veprën penale “Vjedhja në rrethana rënduese”, parashikuar nga nenet 624 dhe 625, të Kodit Penal Italian.

Arrestimi provizor u krye me qëllim ekstradimin e tij drejt Italisë, mbështetur në “Konventën Evropiane të Ekstradimit” të vitit 1957 dhe Marrëveshjen dypalëshe mbi ekstradimet, nënshkruar mes Republikës së Shqipërisë dhe Italisë.

Interpol Tirana në bashkëpunim me Interpol Romën vijojnë veprimet për ekstradimin e këtij shtetasi drejt Italisë.