Pas një peripecie jo të pakët, Mjekësia Ligjore ka bërë publike autopsinë për vdekjen e 19 vjeçares, Rezarta Hajdari, e cila humbi jetën në muajin dhjetor në fshatin Xhyrë, në shtratin martesor vetëm 5 ditë pasi ishte martuar me Olsi Hajdarin.
Autopsia, e cila i është dërguar edhe Prokurorisë Elbasan, ka konstatuar ashtu sikundër dyshohej helmimin nga monoksidi i karbonit i lëshuar nga mangalli me prush që çifti i bashkëshortëve kishin vendosur në dhomën e gjumit për tu ngrohur.
Në fillim ky version nuk u besua nga familjarët, të cilët akuzuan Olsi Hajdarin se kishte helmuar të afërmen e tyre.
Madje familja e Olsit Hajdarit nuk u pranua as në ceremoninë e lamtumirës së Rezarta Hajdarit, ndërkohë që vetë bashkëshorti po luftonte me vdekjen.
Por pas daljes së autopsisë familjarët e Rezarta Hajdarit duket se i kanë ulur gjakrat. Ata kanë pranuar rezultatet e autopsisë duke lënë të kuptohet që nuk do të ketë hakmarrje.
Në një lidhje telefonike për Report Tv, vëllai i 19-vjeçares, Reshit Xibraku është shprehur se është dakord me ekspertizën e bërë nga mjekët dhe se nuk ka më dyshime për vdekjen e motrës së tij.
"Analizat i mora. Jo nuk kam asgjë për të thënë. E pranoj se është helmuar nga mangalli." është shprehur ai.
© SYRI.net