Një shqiptar 49-vjeçar nga Kosova është dënuar nga Gjykata Federale Penale e Zvicrës për mbështetje të ISIS-it. Gjykimi është mbajtur në mungesë të tij Një dënim pa kusht, me heqje lirie, është absolutisht i domosdoshëm, për ta parandaluar atë nga kryerja e veprave të tjera penale, ka shkruar veç tjerash Prokuroria Federale në akuzën e bërë kundër kosovarit 49-vjeçar, të akuzuar për mbështetje të Shtetit Islamik.

I akuzuari në mënyrë të përsëritur dhe të shprehur qartë e ka treguar bindjen e tij kriminale se ai ka vepruar me bindjen më të thellë në këtë drejtim, thuhet më tutje në aktakuzë, shkruan nzz.ch.

Por ndërkohë, vendqëndrimi i këtij ithtari radikal të ISIS nga Kantoni Baselland është i panjohur. Sipas avokatit të tij ai është dëbuar nga autoritetett zvicerane, transmeton albinfo.ch. Por as ai nuk e di se ku jeton aktualisht i akuzuari.

Procesi gjyqësor ndaj tij është iniciuar nga fakti se i akuzuari kishte bërë ankesë kundër urdhërarrestit të bërë ndaj tij. Sipas atij urdhërarresti, kthyer në aktakuzë, kosovari kishte publikuar në media të ndryshme sociale dhe në dy webfaqe të ndryshme, më shumë se njëqind materiale propagandistike për Shtetin Islamik.

Shërbimi Informativ  Federal i kishte rënë atij në gjurmë dhe në vitin 2014 kishte bërë një denoncim në Policinë Kriminale Fedreale, përcjell albinfo.ch.

Më shumë se një vit pas kësaj, nga shkurti i vitit 2016, ishte bërë një bastisje e banesës së të akuzuarit, që kishte rezultuar me gjetje alarmante. Në cd-të e tij ishin gjetur fotografi dhe video që përmbanin pamje të dhunës më ekstreme, transmeton albinfo.ch. Bëhej fjalë për ekzekutime mizore, në mes të të cilave edhe të tilla ku në rolin e ekzekutorit ishin fëmijët.

Po kaq të rënda janë edhe deklarimet që i akuzuari i kishte bërë gjatë disa marrjeve në pyetje. I pyetur për sulmin terrorist të vitit 2015 mbi redaksinë e revistës satirike “Charlie Hebdo” në Paris, ai kishte thënë se për të ka qenë kënaqësi kur ka dëgjuar për këtë sulm.

Sipas aktakuzës ai ka shtuar se dikush që flet keq për profetin, e meriton vdekjen, përcjell albinfo.ch. Në një marrje tjetër në pyetje ai ka thënë po ashtu se kush flet keq për Allahun ose të dërguarin e tij, duhet të vritet.

Gjykata Penale Federale e ka akuzuar mbështetësin radikal të ISIS-it të hënën në mungesë me heqje lirie prej shtatë muajsh pa kusht, për mbështetje të një organizate kriminale, për shkelje të Ligjit mbi ISIS-in si dhe për posedim të materialeve me përmbajtje dhune. Dënimi me 7 muaj burg që ka shpallur gjykata ka qenë pak më i lartë se ai me 6 muaj, sa  e kishte kërkuar prokuroria.