Është zbuluar emri i vrasësit të biznesmenit nga Thethi, Ferdinand Polia. Ai quhet Kristian Sulaj, 27 vjeç, dhe është vëllai i njerit prej të arrestuarve, Alfred Martinit, por e ka ndryshuar mbiemrin.

Sulaj ose ndryshe Martini, pas ekzekutimit gjakftohtë të Nard Polisë në makinën e tij, është larguar drejt Malit të Zi.

Vëllai i tij, Alfred Martini, 20 vjeç dhe dy vëllezër të tjerë, Kleandro, 29 vjeç  dhe Gilbert  Toma, 26 vjeç, që janë arrestuar pas vrasjes, kanë marrë masën e sigurisë sot "Arrest me burg" si bashkëpunëtorë me autorin e krimit. 

Personat në fjalë, të gjithë nga Shkodra,  gjithsesi mbeten deri tani si ekzekutorët, kurse porositësi i vrasjes dyshohet se është një person tjetër, për të cilin ende nuk flitet asgjë.

NJOFTIMI I PLOTE I POLICISE PER TRE ARRESTIMET DHE PERSONIN NE KERKIM

Vijon puna për dokumentimin e plotë me prova ligjore të autorësisë së vrasjes së shtetasit N. P., më datë 20.03.2019. Finalizohet operacioni “Step By Step”. Në pranga tre bashkëpuntorët kryesorë të autorit të dyshuar të vrasjes. Shpallet në kërkim autori i dyshuar.

Gjatë paradites së sotme, pas një pune të mirëorganizuar nga ana e D.V.P. Shkodër, në bashkëpunim me forcat Operacionale të D.P.P. Shtetit Tiranë, dhe Prokurorinë e Rrethit Gjyqësor Shkodër, u bë finalizimi i operacionit “Step By Step” në lidhje me vrasjen e shtetasit N. P., ndodhur më datë 20.03.2019.

Në këtë kuadër u bë ndalimi i shtetasve:

G. T., 26 vjeç, banues në lagjen “Skënderbeg”, Bashkia Shkodër.

K. T., 29 vjeç, lindur dhe banues në lagjen “Skënderbeg”, Shkodër.

A. M., 20 vjeç, banues në fshatin Bardhaj, Shkodër.

Si dhe u bë shpallja në kërkim e shtetasit K. S., 27 vjeç dhe po punohet për gjetjen dhe kapjen e tij.

Pas hetimeve intensive të kryera nën drejtimin e Prokurorisë Shkodër, rezulton se shtetasit e lartpërmendur dyshohen se drejtpërdrejt me veprimet e kryera kanë mbështetur me logjistikë dhe armatim, ndjekur, strehuar, organizuar dhe kryer në bashkëpunim këtë vrasje.

Pas një pune intensive, ndjekjeje me metodat speciale të hetimit, u bë sigurimi i provave materiale dhe shkencore të cilat çuan në dokumentimin ligjor të kësaj ngjarje.

Gjatë veprimeve hetimore u bë e mundur sekuestrimi i automjetit i cili është përdorur nga autorët për ndjekjen e viktimës, orientimin e ekzekutorit, kryerjen e vrasjes, djegien e motorrit dhe largimin bashkë me ekzekutorin.

Gjatë këtij operacioni janë sekuestruar 7 telefona, 17 fishekë të kalibrave të ndryshëm, targa të ndryshme automjetesh shqiptare dhe të huaja dhe dokumenta të ndryshme.

Vijon puna për zbardhjen e plotë të ngjarjes si dhe mbi motivin e kësaj ngjarje dhe identifikimin e personave të tjerë të përfshirë.

Materialet i kaluan Prokurorisë Pranë Gjykatës së Shkallës së Parë Shkodër, për veprën penale “Vrasje me paramendim e kryer në bashkëpunim” dhe “Prodhimit dhe mbajtes pa leje të armëve dhe municioneve luftarake”, parashikuar nga nenet 78-25 e 278 të Kodit Penal.