Policia e Tiranës bëri të ditur sot se ka prangosur tre persona të dyshuar për vrasjen e Jurgen Kurtit në 18 Mars në Tiranë.

Në pranga janë vënë  Elsi Levendi, Olsi Qalliaj dhe Alesio Berberi, ndërsa është në kërkim dhe një i katërt person, emri i të cilit nuk bëhet i ditur

Por ndërsa këta persona janë vënë në pranga, policia thotë se ende nuk e di arsyen se pse ka ndodhur ky krim.

Policia nuk ka bërë publik një motiv për vrasjen e Kurtit, ndërsa arrestimet janë bërë.

Gjatë kontrollit fizik dhe në banesat e këtyre personave, policia ka gjetur dhe sekuestruar një automjet që u ka shërbyer autorëve për tu larguar nga vendi i ngjarjes, si dhe dy makina të tjera luksoze.

Njoftimi i Policisë së Tiranës

Zbardhet ngjarja e ndodhur më datë 18 mars 2019, në rrugën ‘Zef Jubani’, ku u vra me armë zjarri 26 vjeçari J. K.

Arrestohen tre shtetas si bashkëpunëtorë në vrasje, si dhe u shpall në kërkim një tjetër.

Sekuestrohen një armë zjarri ‘Pistoletë TT’, fishekë luftarak, një automjet që u ka shërbyer autorëve për tu larguar pas kryerjes së ngjarjes, një sasi e vogël lënde narkotike, 2470 Euro e lekë shqiptare, si dhe dy makina luksoze.

Pas një pune të mirë organizuar nga Sektori i Hetimit të Krimeve Ndaj Jetës dhe Pronës, në D.V.P.Tiranë, në bashkëpunim me Prokurorinë e Rrethit Gjyqësor Tiranë, në lidhje me ngjarjen e ndodhur në datë 18 mars 2019, rreth orës 22:30, në rrugën ‘Zef Jubani’, ku u vra me armë zjarri shtetasi, J.K., 26 vjeç, është arritur të bëhet dokumentimi ligjor i kësaj ngjarje ku janë ndaluar/arrestuar shtetasit:

-E. L., 21 vjeç, lindur në Athinë/Greqi dhe banues në Tiranë;

-A. B., 33 vjeç, lindur në Patos dhe banues në Patos, Fier;

-O. Q., 22 vjeç, lindur në Fier dhe banues në Patos.

Si dhe u bë shpallja në kërkim e një shtetasi tjetër.

Nga informacionet e grumbulluara, provat e administruara dhe të sekuestruara, si dhe tërësia e  veprimeve hetimore të kryera,  dyshohet se autorët e kësaj ngjarje janë shtetasit e mësipërm së bashkë me një shtetas tjetër të shpallur në kërkim.

Policia gjatë kontrollit fizik dhe në banesat e këtyre shtetasve gjeti dhe sekuestroi një automjet që u ka shërbyer autorëve për tu larguar nga vendi i ngjarjes, si dhe dy makina të tjera luksoze.

 Gjithashtu u gjet dhe një armë zjarri ‘Pistoletë TT’, fishekë luftarak, një sasi prej 2470 Euro e lekë shqiptare, 13 aparate celular, si dhe një sasi e vogël lënde narkotike.

Veprimet hetimore janë në vazhdim e sipër për të bërë të mundur dokumentimin e plotë me prova ligjore të personave të tjerë të përfshirë në këtë ngjarje, si dhe për dokumentimin e motiveve të kësaj ngjarje.

Për arsye hetimore nuk bëjmë me dije të dhëna të tjera pasi cënojnë hetimin.

Materialet  ju dërguan Prokurorisë Rrethit Gjyqësor Tiranë, për veprat penale penale ‘Vrasje me paramendim e kryer në bashkëpunim’,  ‘Prodhim dhe mbajtje pa leje të armëve luftarake’, ‘Prodhim dhe shitje të lëndëve narkotike’.