Fluturimi i së dielës mbrëma i Edelweiss nga Prishtina për në Zyrih, me numër WK405, duket se tek disa udhëtarë do të mbetet gjatë në kujtesë. Në mesin e tyre gjendeshin edhe dy biznesmenë shqiptarë nga Zyrihu, të cilët udhëtojnë së paku dy herë në muaj në linjat Zyrih-Prishtinë-Zyrih, shkruan albinfo.ch.

Sipas tyre, tek para nisjes nga Prishtina, është paralajmëruar prania e një defekti teknik, gjë që ka ndikuar që ata të mos ndihen të sigurt.

Për ta bërë edhe më të rëndë gjendjen, pak minuta para zbritjes, ka qenë po ashtu lajmërimi i pilotit se për shkak një vërejtje sigurie në CockPit, pas zbritjes, në tokë do të ketë edhe automjete të zjarrfikësve si dhe një automjet për tërheqjen e aeroplanit, krahas automjeteve të zakonshme përcjellëse. E me këtë rast janë lutur udhëtarët të mos krijojnë panik. I gjithë ky lajmërim, ka shkaktuar një pasiguri tek disa pasagjerë, shkruan tutje albinfo.ch.

Por sipas zyrtarit të lartë për Komunikime në Edelweiss, Andreas Meier, këtu kishim të bëjmë më shumë me një vërejtje sigurie jo të saktë në Cockpitin e aeroplanit, ndërsa prania e zjarrfikësve dhe automjeteve tjera, është procedurë standard në rrethana të tilla.

“Vërejtja e sigurisë kishte të bënte me një mosfunksionim të mundshëm të rrotës drejtuese të aeroplanit, e në të tilla raste prania e një mjeti tërheqës për aeroplanin dhe e Zjarrfikësve është i domosdoshëm. Por pas zbritjes, duket se vërejtja e shfaqur është sqaruar dhe gjithçka ka shkuar në rregull”, ka deklaruar për Albinfo.ch përmes emailit z.Meier.