A u përdhunua në qelin greke? Del raporti mjekësor për shqiptarin

A u përdhunua në qelin greke? Del raporti mjekësor për shqiptarin

19:50, 12/12/2018
A+ Aa A-

Mjekët grekë kanë deklaruar se shqiptari Aleksandër Luca nuk është përdhunuar në qeli. Mediat greke raportojnë se spitali “Evangelismos” në Athinë ka dalë me një deklaratë ku thotë se pas analizave që iu kryen 20-vjeçarit, nuk ka shenja përdhunimi.

Aleksandër Luca, i cili u dhunua në qeli, hodhi dyshime ditën e djeshme duke thënë se mendonte të ishte abuzuar nga të burgosurit.

Shqiptari u dhunua në qelinë e paraburgimit Avlona pasditen e së hënës. Të burgosurit që e godisnin, kishin filmuar me celularë disa çaste nga dhuna e ushtruar ndaj tij. Ata i bërtisnin përse vrau studenten 21-vjeçare, ndërsa Aleksandë Luca u përgjigjej duke u thënë se e bëri shoku i tij grek.

I riu 20-vjeçar u dërgua në spital dhe më pas në një burg tjetër, që është mbajtur sekret për shkak të sigurisë së tij. Në dëshminë e tij ai tha se kishte dëgjuar të burgosurit teksa thoshin që t’i hiqnin rrobat.

“Dëgjova dikë që u bënte thirrje të tjerëve të më hiqnin pantallonat dhe pastaj më ra të fikët. Kur u zgjova, isha në një dhomë tjetër, pa pantallona dhe pa të brendshme. Nuk e di se çfarë mund të kenë bërë me mua”, deklaroi ai ditën e djeshme. Mirëpo, spitali thotë se nuk ka shenja të përdhunimit ndaj 20-vjeçarit.

Ndërkohë, Prokuroria greke ka nisur hetim disiplinon për gardianët dhe hetim penal për të burgosurit që ushtruan dhunë. Po hetohet gjithashtu si ka mundësi që dera e qelisë së Aleksandër Lucës ishte lënë e hapur.

Aleksandër Luca dhe shoku i tij grek Manolis Koukouras 21 vjeç, i cili ndodhet në një burg tjetër, akuzohen për vrasjen e studentes 21-vjeçare Eleni Tofaloudi. Tre të rinjtë kanë qenë bashkë në shtëpi mbrëmjen e 27 Nëntorit. Aleksandër Luca dhe Manolis Koukouras akuzohen se kanë abuzuar, dhunuar dhe vrarë studenten 21-vjeçare Eleni Tofaloudi. Kjo e fundit, pasi u qëllua barbarisht me hekur në kokë, u hodh më pas në det me këmbë të lidhura. Ngjarja ka ndodhur më 27 Nëntor në ishullin Rodos të Greqisë. Trupi i studentes u gjet të nesërmen nëpër shkëmbinj. Aleksandër Luca dhe Manolis Koukouras kanë pranuar përfshirjen në krim, por akuzojnë njëri-tjetrin për dhunimin dhe vendimin për të hedhur në det 21-vjeçaren.

© SYRI.net

Lexo edhe:

Komentet

Shto koment

Denonco