Gjykata e Tiranës ka vendosur sot si masën e sigurie, “arrest me burg” për 30-vjeçarin Hektor Xheçuka. Ai akuzohet , për vrasjen e Emiljano Boçit dhe plagosjen e mikut të viktimës.

Gjatë seancës së sotme e cila ishte një seancë komunikimi, avokati i të akuzuarit për vrasje me paramendim nuk e ka pranuar akuzën e ngritur ndaj klientit të tij.

Burime brenda seancës bënë me dije se akuza ndaj të arrestuarit ka të bëjë vetëm me ngjarjen e 14 janarit të këtij viti, ku mbeti i vrarë Emiljano Boçi dhe u plagos miku i tij, Melvi Disha.

Përgjime ambientale dhe telefonike si dhe metoda të tjera speciale të kryera gjatë hetimeve të këtyre 10 muajve, duket se kanë orientuar grupin e hetimit drejt Hektor Xheçukës, si autorin e kësaj ngjarjeje. Për momentin nuk jepen të dhëna mbi motivet e këtij krimi, nëse Xheçuka e ka kryer për llogari të tij apo i shtyrë ose i paguar nga të tjerë.