Policia e Kosovës ka konfirmuar të martën se në koordinim me Prokurorinë dhe Qendrën për Punë Sociale, janë duke e trajtuar rastin e 3-vjeçarit në Fushë Kosovë.

Një djalë i moshës 3-vjeçare dyshohet se është rrahur në kopshtin “Gëzimi Ynë” në Fushë Kosovë nga edukatoret e këtij institucioni të hënën.

Zëdhënësja e Policisë për rajonin e Prishtinës, Florie Ahmeti, ka thënë se nuk mund të japë detaje të tjera deri në përfundimin e fazës fillestare të hetimit.

“Policia në koordinim me prokurorinë, qendrën për punë sociale janë duke u marrë me këtë rast. Për detaje mbesim në kontakt pasi të përfundon faza fillestare e hetimit”, ka thënë ajo.

Ministrja e Arsimit, Arbërie Nagavci e ka cilësuar të “papranueshme” dhunën ndaj 3-vjeçarit.

Ajo ka kërkuar inspektorati i Ministrisë së Arsimit që të ndërmarrë masa ndaj edukatorëve të përfshira në dhunë.