Publicisti kosovar, Enver Robelli ka komentuar faktin që Shqipëria nuk shpalli ditë zie për viktimat e aksidetit të tmerrshëm ndryshe prej vendeve si Maqedonia e Veriut, Kosova dhe Bullgaria që shpallën ditë zie, shkruan Syri net Kosova. Robelli e ka konsideruar neveritëse favorizimin që Tirana i bën Serbisë.

"Edhe Vladimir Putini shprehu keqardhje për gati 50 shqiptarë të vdekur në aksidentin e tmerrshëm afër Sofjes në Bullgari, - shkroi Robelli. - Ditë zie shpallën Maqedonia e Veriut, Kosova dhe Bullgaria. Shqipëria nuk e pa të nevojshme një gjest të tillë, pra të shpallë ditë zie. Ka diçka të kalbur në elitat politike në Tiranë. Dhe ky është, në radhë të parë, problem i qytetareve dhe qytetarëve të Shqipërisë që zgjedhin figura jodinjitoze në pushtet.

Krahasojeni mungesën e gjestit për viktimat shqiptare nga Maqedonia e Veriut me propagandën qeveritare të Tiranës kur Serbia i dërgoi nja 10 zjarrfikës për të ndihmuar Shqipërinë pas tërmetit. (Kosova dërgoi forca ushtarake, me atë rast).

Sot u bë shumë propagandë se tani me një aplikim të thjeshtë qytetarët e Shqipërisë dhe Kosovës mund të pajisen me leje qëndrimi dhe leje të punës në vendet përkatëse. Por gjysma tjetër e së vërtetës është se në kuadër të projektit “Ballkani i Hapur” qytetarëve të Serbisë u lejohet e drejta e punës dhe qëndrimit në Shqipëri pa gati asnjë procedurë burokratike. Nga Smedereva në Sarandë – pa asnjë pengesë. Nga Dimitrovgradi në Durrës – po ashtu pa problem. Nga Kikinda në Korçë – nema problema! Nga Beogradi në Berat – pse jo!?

Në rrethana normale, pra nëse Serbia do të pranonte Kosovën si shtet, kjo nuk do të ishte edhe aq problem, por në situatën aktuale ky favorizim aq i madh i Serbisë nga Tirana është neveritës. Rrjedhimisht, në sezonet e ardhshme turistike në bregdetin shqiptar do të kumbojë edhe më shumë muzika e Cecës dhe Dragana Mirkoviqit dhe do të ketë gjithnjë e më shumë lokale që ofrojnë “Leskovačka mućkalica”," ka nënvizuar Robelli.