E hëna në Kosovë ishte ditë zie, në nderim të viktimave të aksidentit tragjik në Kroaci, ku si pasojë e përmbysjes së një autobusi humbën jetën 10 persona dhe u plagosën 40 të tjerë.

Autoritetet në Kosovë thanë se po vazhdojnë bashkërendimin me autoritetet kroate për të ndihmuar të plagosurit, të cilët vazhdojnë të trajtohen në spitalin e qytetit Slavonski Brod.

Viktimat tashmë janë identifikuar dhe siç ka njoftuar ministri i Brendshëm Xhelal Sveçla gjatë ditës së sotme pritet të kryhet autopsia dhe trupat e të ndjerëve të kthehen në Kosovë.

Komuna e Gjakovës me rrethinat është ndër më të goditurat nga ky aksident.

Që në orët e para të mëngjesit u kuptua se njëri nga shoferët e autobusit të aksidentuar, që kishte ndërruar jetë ishte nga Gjakova.

Naser Sylmetaj nga Gjakova kishte një vit që po ushtronte këtë profesion në këtë agjenci.

Vëllai i Naserit thotë se ai kishte mbajtur familjen me këtë punë dhe nuk kishte ndonjë angazhim tjetër.

Edhe Valentina Zhubi Binakaj nga Deçani e martuar në Gjakovë bashkë me vajzën e saj Erleta Binakaj [nga Gjakova] kanë humbur jetën në këtë fatkeqësi të madhe për popullin shqiptar.

Xhaxhai i Erletës, Rasim Binakaj, thotë se kjo do të ishte vizita e dytë e mbesës dhe nënës së saj në Kosovë brenda këtij viti, por që fatkeqësisht tashmë po i presin trupat e tyre të pajetë.

Edhe Leonora Gjotaj-Kolmekshaj nga Juniku e martuar në Gjakovë humbi jetën në këtë aksident.

Familja Kolmekshaj në Gjakovë hapi dyert e mortit për familjaren e saj e cila në udhëtim ishte bashkë me dy fëmijët e që për fat të mirë ata shpëtuan.

Në mesin e atyre që nuk i mbijetuan këtij aksidenti ishte edhe Kujtim Kastrati nga Rahoveci.

Familjarët e Kujtimit thonë se ai ishte nisur nga mërgimi për në Kosovë pasi me 6 gusht do të martonte vëllain.

Edhe 18-vjeçarja Anjeza Bellanica nga Rahoveci ishte nisur nga Frankfurti për në vendlindje, por që tragjedia ja la udhëtimin në gjysmë pa arritur dot vendlindjen.

Në mesin e 10 viktimave të aksidentit të tmerrshëm në Sllavonski Brod të Kroacisë, është edhe 55 vjeçari, Hamet Hoxha nga fshati Randobravë i komunës së Prizrenit.

Djali të ndjerit, Valmiri, tregon se babai Hameti i cili prej shumë vitesh jetonte dhe vepronte në Shtutgart të Gjermanisë, ishte i gëzuar që ishte nisur drejt vendlindjes, pa e menduar se atij dhe disa bashkudhëtarëve tjerë do të iu ndodhte më e keqja.

Sevdail Rrustemi nga Podujeva kishte shkuar në Gjermani disa vite më parë dhe vetëm para pak muajsh ai kishte arritur të marrë edhe familjen atje.

Ditën e diel ishte nisur bashkë me gruan dhe fëmijët për në Kosovë, por aksidenti i rëndë në Kroaci atij ja mori jetën, derisa gruaja dhe dy fëmijët që për fat të mirë shpëtuan.

Edhe Gjyle Maloku nga Juniku dhe Alinda I. nga Peja ishin ndër viktimat e një prej aksidenteve më të rënda që ka ndodhur në Kroaci.

Mëngjesin e të dielës, 25 korrik, një autobus nga Kosova u aksidentua në autostradën ndërmjet Zagrebit dhe kufirit të Serbisë afër Slavonski Brodit.

Autobusi që ishte në një rrugëtim të rregullt nga Gjermania për në Prishtinë, kishte më shumë se 60 udhëtarë.

Autoritetet kroate e përshkruan aksidentin si “një nga aksidentet më të rënda”.