Janë bërë 22 vjet që kur Xhevdet Smajli ka humbur shikimin, pasi ra në një minë të vendosur nga ushtarët serbë.

Ai ishte pjesëtar i UÇK-së dhe punonte në sektorin e deminimit, kur gjatë pastrimit të një terreni të vështirë me bar e shkurre, shpërtheu një minë dhe e plagosi atë së bashku me kolegë të tjerë.

Në Klan Kosova ai u shpreh se këtë detyrë e kishte marrë vullnetarisht, sepse ishte nevoja urgjente që të pastrohej terreni, meqë po pësonin banorët dhe kolegët e tij të UÇK-së.

“Ne kemi rënë në minën e fundit, se pastaj kanë ardhur edhe njësitet e KFOR-it, por s’kanë gjetur më asnjë”, tha Smajli, duke kujtuar momentin tragjik të këtij shpërthimi.

“Në momentin kur ka shpërthyer mina, mua më ka humbur shikimi, ndërsa vetëdija jo. Më kujtohet që kam pasur dhimbje të mëdha dhe i kam lutur shokët që të më vrisnin se s’mund ta duroja dhimbjen. Më pas më ka humbur edhe vetëdija, e cila m’u rikthye deri sa më kanë çuar në spitalin e Ferizajt”.

“Nga aty më kanë tansferuar në spital të Prishtinës, ku nuk dihej ende çfarë po ndodhte sepse gjysma ishte me mjekë serbë që refuzonin ta lëshonin spitalin. Aty kam qëndruar dy ditë dhe më pas familjarët më dërguan në Kukës. Nga aty më dërguan në Gjermani, ku u munduan të ma rikthenin formën e kokës dhe të ma shpëtonin jetën, sepse për sytë më nuk kishte shpresë”.

Pavarësisht kësaj, ai shprehet se nuk është pishman për atë që ka kaluar, pasi ishte i vendosur, se për lirinë e Kosovës do jepte gjithçka.

“Vullneti ka qenë i madh dhe kemi qenë të përgatitur për atë punë. Dihet që dikush duhet t’i japë sytë për t’i fituar gjithë të tjerët”, deklaroi ai.