Richard Grenell sot në Prishtinë, më pas në Beograd, Athinë dhe Jeruzalem

Richard Grenell sot në Prishtinë, më pas në Beograd, Athinë dhe Jeruzalem

07:31, 21/09/2020

I dërguari i posaçëm i presidentit amerikan për bisedimet Kosovë-Serbi, Richard Grenell pritet që nesër të qëndrojë në Prishtinë si pjesë e një delegacioni, që drejtohet nga shefi Ekzekutiv Korporatës Ndërkombëtare të Shteteve të Bashkuara për Zhvillim Financiar, Adam Boehler dhe shefja e Bankës për Eksport-Import, Kimberly Reed, njofton VOA.

Delegacioni amerikan, pjesë e të cilit do të jenë edhe zyrtarë të tjerë të lartë nga Departamenti i Energjisë dhe Biznesit në Shtetet e Bashkuara pritet të zhvillojë takime me zyrtarë të lartë të qeverisë dhe udhëheqës të sektorit privat.

Delegacioni përveç Prishtinës, do të qëndrojë edhe në Athinë, Beograd dhe Jerusalem.

Korporata Ndërkombëtare e Shteteve të Bashkuara për Zhvillim Financiar paralajmëron hapjen e zyrës së parë në rajon duke vendosur një prani të përhershme në Beograd që “do të lehtësojë zbatimin e projekteve me përparësi si Autostrada e Paqes, që do të mbështesin hapjen e vendeve të punës dhe zhvillimin ekonomik në rajon”.

Kjo Korporatë Banka për Eksport-Import, nënshkruan gjatë kësaj jave letrat e interesit me Kosovën dhe Serbinë, për të ndihmuar financimin e Autostradës së Paqes, ndërmjet të dyja vendeve.

Nënshkrimi i letrave pasoi dakordimin e Kosovës dhe Serbisë më 4 shtator në Shtëpinë e Bardhë për normalizimin e marrëdhënieve ekonomike.

Ambasadori Grenell shkroi në rrjetin twitter se “zbatimi i marrëveshjes Kosovë – Serbi është përparësi e administratës Trump”. 

Vizita e delegacionit në katër vende pason “Marrëveshjet e Abrahamit”, për normalizimin e marrëdhënieve të Izraelit me Emiratet e Bashkuara Arabe dhe Bahrejnin.

Pjesë e dakordimit ndërmjet Kosovës dhe Serbisë në Shtëpinë e Bardhë ishte edhe pajtimi ndërmjet Izraelit dhe Kosovës për vendosjen e marrëdhënieve diplomatike.

© SYRI.net

Lexo edhe:

Komentet

Shto koment

Denonco