Ka përfunduar edhe takimi ‘final’ mes delegacionit të Lëvizjes Vetëvendosje dhe të Lidhjes Demokratike të Kosovës, që zgjati më shumë se dy orë në ambientet e kuvendit.
As VV dhe as LDK nuk kanë deklaruar asgjë nëse është arritur ndonjë marrëveshje për formimin e qeverisë, apo është rënë dakort që nuk ka marrëveshje mes tyre.
Lideri i LDK-së Isa Mustafa, pas takimit nuk ka komentuar për mediat asgjë nga takimi, ndërsa raportohet se Albin Kurti i VV-së ende ndodhet në Kuvend.
Para takimit, Mustafa u shpreh optimist për arrtijen e marrëveshjes me Vetëvendosjen, por siç duket një gjë e tillë nuk ndodhi as ditën e sotme.
Sipas qëndrimeve paraprake mes tyre, posti i kryeparalamentarit i ka lënë dy partitë të bllokuara, kjo pasi LDK po insiton që ta ketë këtë post dhe Glauk Konjufca i VV-së të dorëhiqet.
Nënkryetari i LDK-së, Agim Veliu deklaroi sot se LDK nuk heq dorë nga kërkesat e fundit që ia kishte parashtruar Vetëvendosjes.
Ndërkohë sot është raportuar se VV i ka ofruar një post ministror më shumë LDK-së, por këta të fundit nuk janë pajtuar.
© SYRI.net