Pas ndalimit të Xhabir Zharkut, ish-kryetarit të Kaçanikut, policia e Kosovës ka dhënë detaje për arrestimin e tij.
Pak më parë u raportua për arrestimin e Zharkut, teksa nga policia e Kosovës është bërë e ditur se ish-kryetari i Kaçanikut është arrestuar për një rast të ndodhur në vitin 2010.
Zëdhënësi i Policisë së Kosovës, Baki Kelani, ka konfirmuar lajmin.
Po ashtu, Kelani ka bërë të ditur se Zharku është dërguar në mbajtje për 48 orë.
“Sot, më 14.12.2019, Njësia për Hetimin e Krimeve Ekonomike dhe Korrupsionit e Ferizajt, ka arrestuar një të dyshuar për përfshirje në veprat penale: ‘Keqpërdorim i pozitës dhe autoritetit zyrtar” dhe ‘Ushtrim i ndikimit’. Rasti dyshohet se ka ndodhur në vitin 2010 në Kaçanik. Me aktvendim të prokurorit, i dyshuari është dërguar në mbajtje për 48 orë”, ka thënë Kelani.
Në të kaluarën, Zharku ka qenë kryetar i Komunës së Kaçanikut.
Në vitin 2011, Xhabir Zharku u dënua me tre vjet burgim për veprën penale të detyrimit dhe armëmbajtje pa leje.
© SYRI.net