Fatmir Limaj, kryetari i NISMA Socialdemokrate është shprehur i zhgënjyer me Lëvizjen Vetëvendosje pas procesit zgjedhor.

Në një intervistë në “Debat Plus”, Limaj ka thënë se procesi zgjedhor i rregullt ka përfunduar dje dhe sipas tij është pritur që NISMA dhe AKR do të jenë në Kuvend.

Sipas Limaj, pranimi i votave të kundërligjshme nga Serbia në vitin 2017, nuk duhet të jetë precedent që edhe këtë vit të bëhet i njëjti gabim.

“Vendimet e gabuara nuk është mirë t’i përsërisim. Në vitin 2017 votat nga Serbia kanë kaluar. Por nuk duhet të bëhen shkeljet e njëjta edhe tash. Vendimi për të mos pranuar këto vota është shumë i mirë, pasi kjo çështje do të jetë e mbyllur për të ardhmen”.

Gjithashtu, kryetari i NISMA-s ka thënë se “përpjekja për të fabrikuar rezultatin e zgjedhjeve përmes votave të parregullta dëmton demokracinë dhe procesin zgjedhorë”.

“VV me vetëdije po pranon disa paketa duke falsifikuar rezultatin zgjedhor të Kosovës. Qytetari ia ka dhënë atë besim për të fituar 29 deputetë. Ata duhet të ecin para për të krijuar institucionet. Ajo është parti fituese dhe më së paku atyre do të duhej të mos i kontestohej rezultati i zgjedhjeve”.

 Limaj ka folur edhe për votat e diasporës, ku ka thënë se Ligji e përcakton që ato duhet të arrinin në Kosovë deri një ditë para zgjedhjeve.

“Ligji për votat e diasporës është marrë nga Gjermania. Nëse dëshirojmë t’i pranojmë ato vota duhet të ndryshojmë ligjin për votat e diasporës”, tha mes tjerash Fatmir Limaj.