E rrallë, djali i furrtarit që u vra në aksident, fton familjen e kamionistit në mort: Ta ndajmë dhimbjen bashkë!

E rrallë, djali i furrtarit që u vra në aksident, fton familjen e kamionistit në mort: Ta ndajmë dhimbjen bashkë!

08:50, 08/03/2019

Qerim Çoçaj nga Hasi i Prizrenit, i cili punonte si furrtar në Gjilan, mbeti i vdekur në vend nga aksidenti që ndodhi dje në qendër të qytetit të Gjilanit. Djali i të ndjerit, Leutrimi, ka ftuar familjen e shoferit të kamionit që ta ndajnë dhimbjen bashkë.

Gjilani u trondit nga aksidenti që ndodhi dje pasdite në qendër të qytetit. Një aksident trafiku, i cili po dyshohet se ndodhi si pasojë e prishjes së frenave të një kamioni transportues, la të vdekur një person dhe u shkaktoi lëndime dhjetëra të tjerëve.

Për këtë rast është deklaruar edhe babai i shoferit të kamionit që shkaktoi aksidentin. Sokol Avdija mbrëmë ka shprehur keqardhje për rastin. Ai ka thënë se ka dhembje të madhe për personin që humbi jetën,  sikur të kishte qenë djali i tij i vdekur e jo shkaktari. Madje tha se do të kishte preferuar më shumë që djali i tij të ishte në vend të të ndjerit. Po ashtu, ai tha se i gjithë aksidenti ka qenë pa dashje dhe se djali i tij kishte dalë për të punuar për të fituar bukën dhe asgjë më shumë.

“Kam dhimbje më shumë për ta se me pasë qenë djali im në vend të tyre. Ma shumë kam pas qejf me qenë familja ime në vend të tyre, por çka me bë, po më dhimben në shpirt... Ka pasë taksirat, fatkeqësi, nuk e ka bë me qëllim, për një kafshatë buke ka dalë... Ishalla zoti për xhenet.... Nuk kam fjalë me kallxu për keqardhjen...”, ka deklaruar babai i shoferit të viktimës. 

Ndaj këtyre fjalëve të Avdijës ka reaguar djali i furrtarit që humbi jetën, Leutrim Çoçaj. Ai ka ftuar familjen e shoferit të kamionit në varrim, që ta ndajnë dhimbjen bashkë. 

“Unë jam biri i të ndjerit, axhë, as ai s’ka dashtë kjo me ndodhë… Fatkeqësisht baba im qëlloi aty… Familjarët e tu i ftojmë t’na vijnë në varrim e në të pame… Ta ndajmë dhimbjen bashkë”, ka shkruar biri i të ndjerit, Leutrim Çoçaj, në një prej postimeve në Facebook, njofton Gazeta Express

© SYRI.net

Lexo edhe:

Komentet

Shto koment