Eksperti për Ballkanin, Daniel Serwer, ka thënë se teknikisht është i mundur formimi i Forcave të Armatosura të Kosovës, madje edhe pa amendamente kushtetuese, por për këtë do të ishte mirë të keni edhe përkrahjen e serbëve.

Ai gjithashtu ka komentuar rreth integrimit të veriut të Kosovës dhe ambiciet serbe që ajo pjesë t’i takojë Serbisë.

Serëer ka thënë se veriu i Kosovës nuk është i integruar mirë.

“Mendoj se do të ishte mirë edhe për shqiptarët edhe për serbët nëse veriu do të integrohej në kuadër të Planit të Ahtisaarit, i cil parasheh formimin e Asociacionit të Komunave Serbe”, tha analisti amerikan Daniel Serwer, në një intervistë ekskluzive për RTK-në.

Më tej ai tha se nuk beson se Qeveria e Serbisë ka shpresë se veriu i Kosovës mund t’i bashkohet formalisht Serbisë.

“U është thënë nga amerikanët dhe evropianët që kjo s’do të ndodhë. Megjithatë ka njerëz në veri të Kosovës që nuk e duan integrimin me pjesën tjetër të Kosovës. Nëse rusët do të paraqisnin problem atje, s’do të isha i befasuar, por nuk e di nëse kjo do të ndodhë”, tha ai.

Duke folur për 10-vjetorin e shtetësisë së Kosovës, Serwer tha se Kosova ka përparuar shumë, por se pavarësia e saj ende nuk është e plotë.

“Kosovës i mungojnë forcat e armatosura. Ende është nën mbrojtje të NATO-së, ende ka gjyqtarë e prokurorë të huajë në gjyqe, përfshirë edhe gjykatën Speciale.  Nuk ka mbikëqyrje të plotë në veri dhe ka ende shumë kufizime në pavarësinë e Kosovës”, tha ai.

“Mendoj se teknikisht është i mundur formimi i Forcave të Armatosura, madje edhe pa amendamente (ndryshime) kushtetuese, por për këtë do të ishte mirë të keni edhe përkrahjen e serbëve. Mendoj se këtë temë duhet diskutuar me Beogradin, sepse Beogradi vendos se si serbët votojnë në Parlament”, tha ai.

Gjatë intervistës së tij ai tha se “mendon se Gjykata Speciale do ta përmirësojë imazhin e Kosovës”.