Fatura e Evropës për dëmet ekstreme nga moti, është më shumë se dyfishuar këtë dekadë

Moti ekstrem dhe ndryshimet klimatike shkaktuan më shumë dëme financiare në Evropë midis viteve 2020 dhe 2023 sesa në të gjithë dekadën paraprake, sipas një studimi të madh që nënvizon ndikimin e degradimit në rritje të ekosistemit dhe mungesës së ujit te bizneset.

Humbjet mesatare vjetore ekonomike në BE të lidhura me nxehtësinë gjithnjë e më intensive, përmbytjet dhe motin tjetër ekstrem arritën në 44.5 miliardë euro midis viteve 2020 dhe 2023, dy herë e gjysmë më të larta se midis viteve 2010 dhe 2019, tha Agjencia Evropiane e Mjedisit (EEA) në një raport të hënën.

Pothuajse tre të katërtat e kompanive që prodhojnë mallra dhe shërbime në Eurozonë janë “shumë të varura” nga të paktën një ekosistem natyror, tha raporti. Ai vuri në dukje se 75 përqind e kredive bankare u jepen kompanive që mbështeten në burimet natyrore për biznesin e tyre dhe pothuajse 15 përqind e aseteve industriale janë në fusha përmbytjesh.

“Natyra po përballet vërtet me degradim, shfrytëzim të tepërt dhe humbje të biodiversitetit dhe sigurisht, në të njëjtën kohë ne shohim përshpejtimin e ndryshimeve klimatike ”, tha për Financial Times Leena Ylä-Mononen, drejtoreshë ekzekutive e EEA-së. “Kjo po paraqet rreziqe të mëdha për konkurrueshmërinë, prosperitetin afatgjatë, sigurinë dhe cilësinë e jetës së Evropës.”

Evropa është kontinenti që po ngrohet më shpejt në Tokë, me temperatura më të larta që çojnë në modele shumë më të paqëndrueshme të motit dhe një rritje të zjarreve dhe përmbytjeve në pyje.

Sondazhi i EEA-së vjen ndërsa qeveritë e BE-së debatojnë një objektiv ligjërisht të detyrueshëm për të ulur emetimet e gazrave serrë me 90 për qind deri në vitin 2040, krahasuar me nivelet e vitit 1990. Vende, përfshirë Francën dhe Poloninë, kanë kërkuar që udhëheqësit të diskutojnë objektivin në tetor, duke argumentuar se ritmi i tranzicionit do të ndikojë në ekonomitë e tyre që tashmë janë në vështirësi.

Për të lehtësuar barrën, Komisioni Evropian ka sugjeruar që rreth 3 përqind e reduktimeve të emetimeve mund të llogariten duke blerë kredite ndërkombëtare të karbonit, kundër këshillës së bordit këshillimor shkencor të BE-së.

Këtë muaj, BE-ja humbi një afat për të ofruar një objektiv për reduktimin e emetimeve për vitin 2035 në OKB, përpara konferencës së saj për klimën, e cila këtë vit do të mbahet në Brazil. Në vend të kësaj, ajo dërgoi një shënim premtimi duke thënë se do të paraqiste një objektiv midis 66.25 dhe 72.5 përqind. Kjo i ka shtyrë aktivistët të argumentojnë se BE-ja po humbet kontrollin mbi rolin e saj si një lider ndërkombëtar në veprimet për klimën.

«Nuk jep sinjalin e duhur», tha Ylä-Mononen.

Shefi i agjencisë së mjedisit theksoi se objektivat klimatike të BE-së ishin në rrezik jo vetëm nga forcat politike. Raporti tha se rezervat natyrore të karbonit të BE-së - siç janë pyjet dhe tokat me torfe - kanë rënë me rreth 30 për qind në dekadën e fundit, që do të thotë se ato nuk thithin më aq shumë karbon.

EEA tha se mungesa e ujit — kërkesa që tejkalon furnizimin — po prekte rreth një të tretën e popullsisë së Evropës. Bujqësia ishte “përgjegjëse për presionin më të rëndësishëm si mbi ujërat sipërfaqësore ashtu edhe mbi ato nëntokësore”, tha raporti./ FT.